Imajen/Espesiál.

DILI, 18 novembru 2020 (TATOLI)-–Líder Karizmátiku, Kay Rala Xanana Gusmão, ohin, purvolta tuku 14: 00 Otl, hala’o viajen hosi Dili ba Jakarta, Indonézia, ho objetivu atu halo check up rútina ba nia saúde.

Xanana nia viajen ne’e ho aviaun charter (alugér) Jet privadu ho marka PK-YGR liuhosi Aeroportu Internasionál Prezidente Nicolau dos Reis Lobato, Comoro, Dili, ho destinasaun ikus iha Aeroportu Internasionál Halim Perdanakusuma, Jakarta.

“Maun Xanana halo beibeik check up rútina ho periódiku ba nia saúde komesa kedas iha tinan hirak nia laran ona. Maibé, tinan ida-ne’e, tuir loloos maun Xanana ba tiha ona, maibe tanba COVID-19 prejudika nia seidauk ba fali halo check up ba nia saúde. Tanba ne’e maun Xanana aproveita tempu hodi halo vizita no asaun karitativu hale’u munisípiu sira,” Prezidente Konsellu Diretiva Nasionál (CDN)-CNRT, Dionísio da Costa Babo Soares, informa ba Agência Tatoli hodi halo klarifikasaun ba dúvida no espekulasaun sira kona-ba Xanana nia saúde, kuarta ne’e.

Imajen/Espesiál.

Eis Ministru Negósiu Estranjeiru no Kooperasaun (MNEK) iha Governasaun Aliansa Mudansa ba Progresu ka Aliansa Maioria Parlamentár, Dionísio Babo, esklarese prezidente partidu Congresso Nacional para a Reconstrução de Timor-Leste (CNRT), Kay Rala Xanana Gusmão, nia saúde estavel loos (forte loos).

“Maun Xanana forte loos. Buat hotu la’o di’ak loos. Maibé família no estrutura partidu fó hanoin atu maun Xanana tenke ba halo konsulta periódiku. Tanba ne’e mak durante ne’e halo hela kontaktu ba haree tempu ne’ebé di’ak-liu, haree mós ba transporte no konsulta mós ho autoridade nasaun destinasaun (Indonézia, red) hodi ohin oportunu ba maun Xanana bele halo vou ka viajen ba halo check up ba nia saúde rutina,” Dionísio Babo hateten.

Tuir Babo, ida-ne’e hanesan konsulta periódiku no hein katak maun Xanana sei fila lalais mai iha tempu badak nia laran. 

Nia husu ba povu no públiku atu labele pániku tanba Xanana nia saúde di’ak no estavel loos. 

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Bv MBKXG, hein ktk Nai Maromak, Matebian sr ho Rai lulik Timor nian sei akompanha nafatin Ita bo’ot to’o fila hikas mai rai lulik RDTL ho isin dk no saudável nafatin 🙏🙏🙏

HAKEREK NO HATÁN

Please enter your comment!
Please enter your name here