Ministru Transporte Komunikasaun, José Agostinho da Silva. Imajen TATOLI/Egas Cristovão

DILI, 27 novembru 2020 (TATOLI)Iha Orsamentu Jerál Estadu (OJE) ba tinan fiskál 2020, verba ba Ministériu Transporte no Komunikasaun (MTK) ezekuta ona hamutuk 88,58%.

Ministru Transporte no Komunikasaun, José Agustinho da Silva, relata progresu serbisu ministériu inklui ezekusaun orsamentu ba Primeiru-Ministru (PM), Taur Matan Ruak.

“Orsamentu 2020 ba MTK hamutuk millaun $7,10 no progresu ezekusaun to’o ohin loron bazeia ba dadus Free Balanceatinje ona 88,58%,” Ministru José Agustinho, tenik hafoin hasoru malu ho Xefe Governu iha Palásiu Governu, sesta ne’e.

Notísia Relevante: OJE 2020: orsamentu millaun $6,571 ba MTK aprovadu iha espesialidade

Ezekusaun kontribui husi atividade ministériu, enkuantu kapitál menór, kapitál dezenvolvimentu tenke ezekuta obra sira ne’ebé halo.

“Bainhira halo pagamentu tenke prosede ba rekomendasaun hosi Ajénsia Dezenvolvimentu Nasionál (ADN),” nia akresenta.

Aleinde ne’e, relata mós kona-ba progresu serbisu no preparasaun debate proposta OJE 2021.

“Ami halo ona preparasaun molok ba debate iha Parlamentu no prepara bazeia ba orientasaun Primeiru-Ministru, katak tenke prepara-an antes ba Parlamentu tanba ámbitu orsamentu agora bazeia ba programa. Entaun orsamentu iha programa no kada programa iha ninia sub-programa no kada sub-programa iha mós títulu kualidade no hosi ne’e iha indikadór inklui meta atu atinje,” Ministru esplika.

Orsamentu tinan ne’e ba MTK hamutuk millaun $6,571, ne’ebé maka fahe ba saláriu no vensimentu millaun $1,397, bens no servisu millaun $4,99, transferénsia públika $623.000, kapitál menór $236.000, kapitál dezenvolvimentu $217.000.

Prioridade governasaun ba ministériu ne’e hamosu medida prinsipál setór ualu hanesan garante jestaun sistema transporte terrestre, promove dezenvolve no jestaun infraestrutura komunikasaun, asegura jestaun operasaun meterolojia no jeofízika, garante normál funsionamentu sirkulasaun meiu transporte marítima, asegura prestasaun serbisu portál, implementasaun polítika jéneru, no ikus liu promove boa governasaun no jestaun institusionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here