Governu defende Proposta OJE 2020 iha debate faze espesialidade loron datoluk, iha sala plenáriu, kuarta (07/10). Imajen Tatoli/Egas Cristovão

DILI, 07 outubru 2020 (TATOLI)Parlamentu Nasionál (PN) aprova ona orsamentu 2020 ba Ministériu Transporte no Komunikasaun (MTK), iha espesialidade ho votu a-favór 44, kontra 9  no abtensaun 12.

“Orsamentu ba Ministériu Transporte no Komunikasaun aprovadu,” deklara Prezidente Parlamentu Nasionál, Aniceto Guterres, iha ámbitu diskusaun proposta Orsamentu Jerál Estadu (OJE) 2020 iha faze espesialidade ba loron datoluk, iha sala plenáriu, kuarta ne’e.

Orsamentu ba MTK hamutuk millaun $6,571, ne’ebé maka fahe ba saláriu no vensimentu millaun $1,397, bens no servisu millaun $4,99, transferénsia públika $623.000, kapitál menór $236.000, kapitál dezenvolvimentu $217.000.

Alokasaun ba Agabinete Ministru Transporte no Komunikasaun  $307.000, gabinete planeamentu polítiku kooperasaun $81.000, gabinete jurídiku $19.000, gabinete inspesaun no auditoria $66.000.

Diresaun nasionál orsamentu no jestaun finanseira $720.000, diresaun nasionál rekursu umanu $205.000, diresaun nasionál aprovizionamentu $205.000, diresaun nasionál administrasaun lojíztika no patrimóniu $102.000, diresaun jerál administrasaun finansa $54.000, diresaun jerál transporte no komunikasaun millaun $1,132, diresaun nasionál servisu transporte marítima $148.000, diresaun nasionál metorolojia no jeofízika $206.000, diresaun nasionál transporte terrestre millaun $1,55, diresaun nasionál Koreiu Timor-Leste $198.000, no diresaun nasionál informátika no teknolojia millaun $2,72.

Iha proposta rua hosi bankada opozisaun sira ne’ebé propoin atu diminui montate $100.000 hosi kategoria despeza bens no servisu alokadu ba viajen estranjeiru ho razaun tempu azekusaun ba atividade sira ne’e limitadu ho kondisaun surtu pandemia COVID-19 la permite atu halo viajem ba estranjeiru.

Maske nune’e, proposta hosi bankada opozisaun ne’e la pasa.

Ministru Transporte no Komunikasaun, José Agustinho da Silva, hateten proposta hosi deputadu atu dimunui iharubrika viajen estranjeiru nian, la pertinente tanba MTK iha ona dívida no presiza tebes osan atu selu.

“Orsamentu bens no servisu ne’ebé propoin atu hasai ho montante $100.000 maibé hafoin ami konsulta ho proposta ida ne’e, ninia totál iha de’it  $65.000 hosi rúbrika viajen estranjeiru mai hosi gabinete ministru ho montante $39.000, gabinete polítika kooperasaun  $43.000, diresaun nasionál transporte marítima $2.000, diresaun jerál transporte komunikasaun $3.000, no diresaun nasionál meterolojia no jeofízika $1.000,” informa Ministru José Agustinho.

Tuir governante ne’e, hosi orsamentu sir sai hanesan dívida ba MTK tanba atividade Ministériu hala’o ona tinan fiskál 2019, ho nune’e solisita ba deputadu sira atu konsidera nafatin hodi selu tiha dívida ministériu nune’e iha futuru labele hatodan fali orsamentu MTK iha tinan 2021.

Iha tinan 2020 MTK prioritiza medida prinsipál ualu hodi garante governasaun di’ak.

Bazeia ba planu anuál (livru 2), prioridade MTK mak bens estár sosiál, protesaun sivíl no sidadania, inkluzaun, protesaun no solidariedade sosiál (muller no labarik), mellora konektividade nasionál iha área xave hanesan, infraestrutura, lojíztika, no telekomunikasaun.

Hosi prioridade governasaun ne’e hamosu medida prinsipál setór ualu hosi MTK iha tinan 2020.

Medida prinsipál hirak ne’e maka hanesan garante jestaun sistema transporte terrestre, promove dezenvolve no jestaun infraestrutura komunikasaun, asegura jestaun operasaun meterolojia no jeofízika, garante normál funsionamentu sirkulasaun meiu transporte marítima, asegura prestasaun serbisu portál, implementasaun polítika jéneru, no ikus liu promove boa governasaun no jestaun institusionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here