Atividade feira nasionál iha suku Lauhata, Imajen TATOLI/António Gonçalves

LIQUIÇÁ, 27 novembru 2020 (TATOLI)–Negosiante feira nasaionál ne’ebé realiza iha suku Lauhata apresia ho inisiativa Governu tanba bele realiza eventu ne’e iha ámbitu komemorasaun loron Proklamasaun Independénsia loron 28 novembru ba dala-45.

Negosiante Venancia Filomena, kontente tanba bele hola parte iha feira ne’e tanba bele hetan rendimentu di’ak kompara ho loron bain-bain.

“Maski feira  loron lima de’it, maibé ami nu’udar negosiante ne’ebé partisipa eventu ne’e sente kontente,” Negosiante ne’e tenik ba Agência TATOLI, iha feira nasionál, suku Lauhata, sesta ne’e.

Notísia Relevante: Enserra feira nasionál iha Lauhata, MTKI agradese partisipasaun negosiante

Tuir nia, eventu ne’e aleinde bele anima komunidade lokál, fó mós benefísiu ba negosiante sira.

“Rendimentu antes ne’e ladun barak, maibé ho feira ne’e ami bele hetan kalan ida $100 to’o $200 no dala ruma liu, tanba ne’e ami kontente,” nia akresenta.

Atividade feira nasionál iha suku Lauhata, Imajen TATOLI/António Gonçalves

Tanba ne’e, hanesan komunidade lokál no negosiante, nia husu ba Governu atu kontinua eventu feira.

“Ha’u negosiante, husu  Governu atu realiza feira hanesan  la’ós iha loron boot de’it, maibé se bele domingu ida dala ida, ou di’ak liután loron-loron, nune’e bele fó oportunidade ba negosiante sira atu halo atividade ekonómia ho di’ak,” nia fó hanoin.

Iha fatin hanesan, negosiante Mariana de Jesus, agradese ba Governu tanba bele realiza feira nasionál hodi fó oportunidade ba negosiante sira halo promosaun ba produtu.

Atividade feira nasionál iha suku Lauhata, Imajen TATOLI/António Gonçalves

“Ha’u fa’an produtu artezenatu, pasta, tais no seluk tan, ha’u kontente tanba hetan vizita husi ema barak no ema mós hola barak. Iha loron dahuluk ema ladun hola maibé iha loron tuir mai ema hola maka’as dala ruma hola husi $50 to’o $100,” nia dehan.

Feira nasionál ne’e realiza hahú iha loron 22 to’o 27 novembru, iha suku Lauhata, postu administrativu Bazartete, munisípiu Liquiçá.

Eventu ne’e realiza hosi Ministériu Turizmu, Komérsiu no Indústria (MTKI) no Ministériu Administrasaun Estatál (MAE), ho kolaborasaun hosi parte autoridade lokál, ho orsamentu $44.000 resin no envolve grupu empreza kiik hamutuk 74 no instituisaun Estadu 23.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here