Enserramentu feira nasionál iha suku Lauhata, sesta (27/11). Imajen TATOLI/Natalino Costa

LIQUIÇÁ, 27 novembru 2020 (TATOLI)—Iha ámbitu enserramentu feira nasionál hodi komemora loron Proklamasaun Independénsia ba dala-45, Ministru Turizmu, Komérsiu no Indústria, José Lucas do Carmo da Silva, agradese partisipasaun autoridade lokál, líder komunitáriu, komunidade lokál inklui negosiante sira tanba eventu ne’e la’o ho susesu.

Feira nasionál ne’e realiza hahú iha loron 22 to’o 27 novembru, iha suku Lauhata, postu administrativu Bazartete, munisípiu Liquiçá.

“Agradese partispante sira, liuliu ba negosiante no instituisaun Estadu ne’ebé hola parte iha feira nasionál. Ita bo’ot sira-nia kompromisu no dedikasaun maka lori susesu, ita bele to’o ohin loron halo enserramentu,” Ministru José Lucas, hateten iha seremónia enserramentu feira, iha suku Lauhata, sesta ne’e.

Eventu ne’e realiza hosi Ministériu Turizmu, Komérsiu no Indústria (MTKI) no Ministériu Administrasaun Estatál (MAE), ho kolaborasaun hosi parte autoridade lokál, ho orsamentu $44.000 resin no envolve grupu empreza kiik hamutuk 74 no instituisaun Estadu 23.

Notísia Relevante: MAE-MTKI lansa feira nasionál iha Liquiça

Iha fatin hanesan, Ministru Administrasaun Estatál, Miguel Pereira Carvalho, kongratula parte hotu, liuliu komunidade munisípiu Liquiçá tanba hatudu espíritu kooperativa hodi fó susesu ba eventu ne’e.

“Maski feira nasionál ne’e loron lima de’it, maibé ha’u parabeniza parte hotu ne’ebé kontribui hodi fó susesu ba eventu ida-ne’e,” nia subliña.

Governante ne’e enkoraja nafatin entidade hotu hodi nafatin hatudu apoiu, nune’e bele fó susesu ba komemorasaun loron Proklamasaun Independénsia ba dala-45 ne’ebé sei realiza aban.

“Seremónia sira ne’e, ita halo atu valoriza luta na’in no fundadór nasaun sira ne’ebé uluk luta hodi alkasa ita-nia mehi ba ukun rasik-an, hafoin ita sai nasaun ida independente,” Ministru akresenta.

Nune’e mós, Administradór munisípiu Liquiçá, Domingos da Conceicão, apresia inisiativa MTKI no MAE ba realizasaun eventu tanba bele fó oportunidade ba komunidade lokál aprezenta produtu.

“Ha’u lori populasaun Liquiçá tomak, hato’o agradesimentu ba Ministru Administrasaun Estatál, ne’ebé hanesan Prezidente Komisaun no Ministru Turizmu, Komérsiu no Indústria, tanba hili Liquiçá hanesan fatin realiza feira nasionál ba komemorasaun loron Independensia Unilaterál 28 novembru,” nia dehan.

Nia espera seremónia tuir mai bele la’o di’ak, tanba marka prezensa hosi órgaun soberanu sira inklui membru Governu no deputadu sira.

Tuir Administradór ne’e, eventu nasionál ne’e  la’o di’ak no animadu tebes. 

Iha seremónia enserramentu feira nasionál ne’e, fahe mós prémiu ba  ba manan na’in sira ne’ebé fa’an produtu lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here