Aktividades Feira Nasional iha Lauhata, Likisa.Imajen/TATOLI

LIQUIçA, 22 novembru 2020 (TATOLI)—Ministru Administrasaun Estatál, Miguel de Carvalho akompaña husi Ministru Turizmu Komérsiu no Indústria (MTKI-sigla portugés), José Lucas do Carmo da Silva, domingu (22/11) lansa feira nasionál hodi komemora loron proklamasaun unilaterál Timor-Leste ba dala 45.

Feira Nasionál ne’e hala’o iha Lauhata, Liquiça durante loron lima hahú loron 22 to’o 28 fulan-novembru 2020.

“Ita la husik ema Ida iha kotuk tanba husi feira ida fó oportunidade ba sidadaun atu sente husi komemorasaun 28 novembru ida ne’e,” dehan MAE, Miguel de Carvalho iha ninia intervensaun durante serimonia abertura feira nasionál iha Lauhata, ohin.

Nia hateten feira ida ne’e parte ida atu halo rekoperasaun ba ekonomia iha rai-laran relasiona ho pandemia globál COVID-19.

“Tanba ne’e feira sira hatudu katak, maske ita hela krize pademia COVID-19 maibé ita kontinua hamutuk garante saúde públika ita-nia sidadaun no rekoperasaun ekonómia ba ita-nia nasaun,”tenik tan.

Iha fatin hanesan Ministru Turizmu Komérsiu no Indústria (MTKI), José do Carmo da Silva, informa feira nasionál ne’e hodi fó oportunidade ba negósiante kiik sira atu faan sira-ninia produtu lokál no produtu artezenatu sira seluk tan.

Nune’e mós Instituisaun Estadu sira atu esplora no hatudu sira-nia servisu no programa saida maka sira halo ona durante ne’e atu públiku bele hatene.

“Atu ita bele haree kreatividade saida maka sira iha entermus ho prodúz artezenatu no kulturál sira mai hamutuk, iha feira ne’e hodi bele promove produtu ne’ebé iha,” katak Governante.

Nune’e mós Diretór Jerál Turizmu, José Quintas, relata grupu empreza kiik hamutuk 74 no instituisaun Estadu 23 maka partisipa iha eventu refere.

“Orsamentu ba eventu ne’e rihun $ 44-resin, eventu ne’e hala’o durante loron lima sei ensera iha 28 novembru,” nia hateten.

Jornalista: Natalino Costa

Editór:Agapito dos Santos

HAKEREK NO HATÁN

Please enter your comment!
Please enter your name here