Jogadór Boavista FC Timor haksoit kabesa bola. Imajen/Liga Timorense

DILI, 27 novembru 2020 (TATOLI) – Ekipa Boavista FC Timor susesu ultrapasa ba kuartu finál tasa 12 Novembru, epoka ne’e, hafoin manan 3-0 ba Emanuel FC.

Notísia Relevante : Lalenok United FC “sempre na frente”

Ho vitória Boavista FC Timor ne’e maka nia iha direitu ba tiketi hodi joga hasoru ekipa jigante Lalenok United FC iha  jogu kuatru finál  (semi finál)  tasa 12 Novembru.

Jogadór-sira Boavista FC Timor selebra sira-nia vitoria banhira hatama golu ba guarda rede Emanuel FC. Imajen/Liga Timorense

Golu vitória Boavista FC Timor hatama hosi jogadór Pedro Vicente (6) iha minutu 43, hafoin simu bola pasa ho kalma hosi nia “kamarada” médiu Abrão Mendonca.

Hosi golu ne’e halo jogadór no adeptu-sira Emanuel nia fuan la hakmatek. Tanba ne’e, jogadór-sira Emanuel nian  halo lansa atake, maibé  esforsu ne’e la rezulta golu ba guarda rede Boavista FC Timor to’o jogu primeira parte termina.

Hakat ba segunda parte ekipa rua nafatin lansa kontra ho atake ba malu, maibé Boavista FC Timor iha kbiit liu, nune’e iha minutu 58 Danilson Araujo (11) lansa tan golu ida hodi muda rezultadu ba 2-0.

Hatene katak Boavista FC Timor iha ona esperansa manan jogu ne’e, maka jogadór-sira Boavista FC Timor lansa jogu defensivu, kalma no la ansi. Sira halo golu bainhira hetan oportunidade.

Neineik no beibeik, iha minutu 90+2 Rivaldo Correia lansa tan golu ida hodi hatuur loloos Boavista FC Timor nia vitória ba 3-0 to’o minutu ikus. Ho nune’e, jogu ne’ebé hala’o iha Estádiu Munisipál Dili, Boavista FC Timor presta vitória ba nia adeptu-sira no Emanuel FC hela ho derrota no elimina ona hosi Tasa 12 Novembru, epoka ne’e.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here