Jogadór Lalenok United FC selebra vitória bainhira hatama golu ba guarda rede Lica-LIca Lemorai FC iha Tasa 12 Novembru 2020, iha Estádiu Munisipál Dili, Kinta (26/11). Imajen Tatoli/António Gonçalves

DILI, 26 novembru 2020 (TATOLI) –Adeptu-sira no dirijente hotu hosi klube Lalenok United FC hatudu sira-nia apresiasaun  no orgullu boot ba prestasaun ne’ebé sira-nia jogadór  hatudu iha jogu uitavu finál, Tasa 12 Novembru, epoka ne’e.

Notísia Relevante : Tasa 12 Novembru, rezultadu “fantástiku” Lalenok vs FIEL 12-0

Jogadór Lalenok United FC kontrola hela bola bainhira joga ho Lica-Lica Lemorai FC iha Tasa 12 Novembru 2020 iha Estádiu Munisipál Dili, Kinta (26/11). Imajen Tatoli/António Gonçalves

Liuhosi jogu, ohin loraik, iha Estádiu Munisipál Dili,  ekipa Lalenok United FC hatudu duni sira-nia glória katak sira maka sempre iha oin  “sempre na frente” iha lala’ok jogu futeból ne’ebé hala’o iha rai-laran.

Liuhosi jogu-sira iha epoka liubá hanesan Supertasa 2019 Lalenok United FC hatudu nia prestasaun hodi sai kampiaun. Nune’e mós sai kampiaun iha Kopa Federasaun Futeból Timor-Leste (FFTL) 2020.

Priviléjiu ida-ne’e sai hanesan títulu ne’ebé sira sei defende no kontinua defende to’o minutu ikus lala’ok jogu Tasa 12 Novembru 2020.

Liuhosi jogu kontra   Lica-Lica Lemorai FC, jogadór-sira Lalenok United FC asegura duni sira-nia priviléjiu “kampaun” hodi manan Lica-Lica Lemorai FC 7-0.

Golu tolu ne’ebé kontribui ba vitória Lalenok United FC nian kontribui hosi Lourenco Freitas (19) iha minutu “23, “40 no minutu 50.

Golu haat-seluk ne’ebé hatuur vitória loloos ba Lalenok United FC kontribui mós hosi Elias Mesquita (10) iha minutu 25,  Santiago da Costa (9) iha minutu 27, Paulo Galli Freitas (21) iha minutu 42 ho Rofino Gama (11) iha minutu (57) jogu primeira parte nian.

Vitória Lalenok United FC nian ne’e fó oportunidade luan liu hodi hakat ba jogu kuatru finál (semi finál) tasa 12 Novembru, no Lica-Lica Lemorai FC tenke despede ona Estádiu Munisipál Dili hodi hein fali jogu tuir mai tasa 12 Novembru iha tinan oin 2021.

“Ami satisfás ho vitória ne’ebé ami hetan ne’e, maibé ha’u lakohi fó komentáriu barak tanba ha’u triste hela ho novidade morrer ha’u nia ídolu Diego Maradona,”  Simón Elissetche, treinadór Lalenok United FC ba jornalista-sira hafoin termina jogu entre nia ekipa ho Lica-Lica Lemorai ho rezultadu 7-0.

Hosi sorin seluk, asistente treinadór Lica-Lica Lemorai FC, Nelson Soares, hateten derrota ne’ebé nia klube enfrenta hanesan normal ida. Maibé nia promete sei halo esforsu nafatin atu bele prepara-aan di’ak liu tan iha jogu sira tuir mai iha torneiu futeból Timor-Leste nian.

“Iha jogu ne’e, iha maka manan, lakon no empata. Tanba ne’e, derrota ne’e normal ba ita hotu. Ami nia parabéns ba Lalenok United FC,” nia hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here