Alunu kursu 5◦ CPOS na’in-28 hala’o vizita ba postu UPF no F-FDTL iha liña fronteira terrestre, Bobonaro. Imajen/IDN-TL

DILI, 27 novembru 2020 (TATOLI)- Alunu hosi turma 5◦ Kursu Promosaun Ofisiál Superiór (CPOS) iha Institutu Defeza Nasionál Timor-Leste (IDN-TL) hamutuk ema na’in-28  termina ona sira-nia formasaun iha area operasaun no administrasaun iha Postu Unidade Patrullamentu Fronteira (UPF) no Postu FALINTIL-Forsa Defeza Timor-Leste (F-FDTL)   iha liña fronteira terrestre Bobonaro.

Notísia Relevante : Alunu CPOS na’in-28 halo estudu komparativu ba munisípiu haat

Alunu  CPOS ne’e kompostu hosi Kapitaun F-FDTL na’in-20 no Inspetór Xefe Polísia Nasionál Timor-Leste  na’in-ualu (8).

Durante hala’o pratika ekipa IDN-TL akompaña  alunu CPOS vizita ba F-FDTL Manduki, Kompañia Alfa UPF Batugade, Postu  Polísia Militár (PM) no Eskuadra PNTL iha Batugade.

Komunikadu imprensa hosi IDN-TL ne’ebé Agência Tatoli asesu, ohin, informa katak iha vizita ne’e, ekipa sira observa direita Postu konjunta UPF no Polísia Militár iha  Badut Mean, Suku Cova, Derok Gren, Leohitu, no Postu Administrativu Balibo nian.

Ekipa-sira vizita mós Postu UPF Nunura, Tunubibi, Komandu PNTL Bobonaro hodi liubá Postu Altu Lebos no Memo.

Diretór Ensinu Formasaun IDN, Tenente Koronél, Benedito Diaz Quitas “Punu Fanu” dehan, vizita estudu ne’e  ho ninia finalidade atu aplika  estuda teórika no dutrinária no ferramentas-sira  iha aulas ne’ebé durante ne’e  ba terrenu hodi ajusta ho realidade iha kampu.

“Punu Fanu” hatutan, objetivu seluk hosi formasaun ne’e hodi loke alunu-sira nia koñesimentu  hodi hatene oinsá karakterístika  servisu iha área fronteira nian.

Bainhira sira apár ona ho servisu iha terrenu,  Punu Fanu esplika, ba futuru, sira iha ona informasaun  mínimu ba  situasaun reál iha liña fronteira ne’ebé luan no menus rekursu oin-oin hodi asegura metin soberanu Timor-Leste hosi ameasa oin-oin.

Punu Fanu espera, ho vizita ne’e, alunu-sira bele haree no observa direita postu militár ho polisiál nian kona-ba posibilidade para bele estuda oinsá minimiza difikuldade hirak ne’e no kompleta matéria kursu  ajuda sira nia traballu individuál ne’ebé IDN entrega ona ba alunu  hodi haboot sira-nia koñesimentu hodi finaliza sira nia traballu.

Durante hala’o vizita, estudante sira observa direita difikuldade ne’ebé tinan barak membru UPF no F-FDTL sira enfrenta maka kondisaun estrada,  postu UPF ladún di’ak, menus ekipamentu servisu,  distánsia hosi postu dook malu,  la asesu ba eletrisidade, falta bee-moos no problema báziku seluk tan, maibé membru UPF kontinua la’o ain hodi halo kontrolu ba lutu seguransa hodi garante estabilidade seguransa iha fronteira terrestre.

Problema seluk tan maka, membru UPF menus fasilidade rádiu komunikasaun, tanba pesoál seguransa sira uza de’it sira-nia telefone privadu hodi komunika ba malu, bainhira mosu problema ruma.

Iha fatin hanesan, Diretora Fundu Dezenvolvimentu Kapital Umanus (FDCH), Leila Cárceres  do Santos dehan, programa kursu promosaun ofisiál superiór  PNTL no F-FDTL  besik tinan ida ona, tanba ne’e, sira presiza hakle’an sira-nia koñesimentu iha terrenu.

Formasaun ne’e rasik ninia orsamentu finansia hosi FDCH ho montante  rihun $60 ne’ebé implementa tuir planu no programa.

FDCH agradese, formasaun iha terrenu ne’e sira bele akompaña direita hodi halo mós monitorizasaun no fiskalizasaun atu bele kompleta iha relatóriu.

Alunu 5o  CPOS sira hahú formasaun iha IDN iha fevereiru 2020 no tuir kalendáriu sei finaliza iha fevereiru 2021.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here