Alunu 5◦ Kursu Promosaun Ofisiál Superiór (CPOS, sigla portugés) hamutuk ema na’in-28 iha IDN-TL hala’o estudu komparativu ba munisípiu haat. Imajen IDN-TL/Espesiál

DILI, 23 novembru 2020 (TATOLI)- Alunu 5◦ Kursu Promosaun Ofisiál Superiór (CPOS, sigla portugés) hamutuk ema na’in-28 iha Institutu Defeza Nasionál Timor-Leste (IDN-TL) hala’o estudu komparativu ba munisípiu haat.

Alunu CPOS kompostu hosi Kapitaun F-FDTL na’in-20 no Inspetór Xefe na’in-ualu (8) hosi PNTL, sei hala’o vizita ba Munisípiu Bobonaro, Covalima, Regiaun Administrativu Espesiál Oe-Cusse Ambeno (RAEOA)   no Aileu.

Tuir oráriu ne’ebé IDN define, atividade vizita estudu hosi alunu 5◦  CPOS  hahú hosi Munisípiu Bobonaro hosi loron 23 to’o 28 novembru, tinan ne’e.

Komunikadu imprensa ne’ebé Agência Tatoli simu hosi mídia IDN-TL relata katak, vizita ne’e sei kontinua ba Munisípiu Covalima  iha loron 29 novembru to’o loron 4  dezembru. Kontinua ba RAEOA,  iha loron  7 to’o 14 dezembru no Munisípiu Aileu sei hahú iha loron 15 to’o 20 dezembru, tinan ne’e.

Vizita estudu husi alunu 28 ne’ebé akompaña hosi  funsionáriu  ekipa IDN   sira,  enkuadra iha matéria operasaun nian ne’ebé kompostu husi Planeamentu no Konduta Ezersísiu, Operasaun Konjunta no Kombinada, Planeamentu Operasaun, Operasaun Apoiu Paz.

Iha bloku estratéjia nian, Sistema Internasionál konflitualidade, jeopolítika, estratéjia no Planeamentu Estratéjiku, Estratéjia Nasionál, Istória Militár Universal, Istória Militár Timor-Leste, konferénsia kona-ba Organizasaun Internasionál.

“Objetivu hosi vizita ne’e  hodi alunu 5◦ CPOS sira, hatene di’ak liután postu militár no polisiál ne’ebé lokaliza iha área remotas,  halo planeamentu ba operasaun nian no apoiu halo traballu investigasaun sientífika no kontribui ba desizaun ne’ebé sira bele halo iha asaun futuru nian,” Diretór Servisu Akademia IDN, Guilherme Soares hateten.

Guilherme dehan, alunu-sira ne’ebé tuir kursu CPOS sai nu’udar kondisaun ida espesiál ba promosaun ba Postu  Majór ka Kapitaun, Tenente no Superintendente Asistente no integra-an iha prosesu formasaun ba karreira ba ofisiál F-FDTL no PNTL.

Iha fatin hanesan, Diretór Ensinu Formasaun Tenente Koronél Benedito Diaz Quintas “Punu Fanu”   dehan, liuhosi vizita ne’e bele lori alunu CPOS  atu manan esperiénsia di’ak liután iha área komandu ninian no área administrasaun no tátika sira iha Postu Komandu F-FDTL, PNTL, ho Unidade Polísia Fronteira (UPF), Unidade Polísia Marítima (UPM) no Komandu PNTL hosi Munisípiu haat.

Nia hatutan, finalidade seluk hosi atividade vizita atu kapasita alunu CPOS no hasa’e sira-nia abilidade no haboot sira-nia koñesimentu kona-ba área administrasaun, no tátika estratéjia militár-sira, hodi kontribui ajuda alunu-sira hakerek sira nia testu final.

Alunu 5o  CPOS hahú formasaun iha IDN-TL iha fevreiru 2020 no tuir kalendáriu sei finaliza iha fevereiru 2021.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here