Vise-Ministru Turizmu, Komérsiu no Indústria, Domingos Lopes Antunes. Imajen/Mídia MTKI

DILI, 26 novembru 2020 (TATOLI)—Ministériu Turizmu, Komérsiu no Indústria (MTKI) halo hela preparasaun atu halo akordu ho loja indikadu troka voucher ba produtu Cesta Bázika.

“Semana oin Ministériu Turizmu, Komérsiu no Indústria sei formaliza hotu akordu no halo kontratu detallu  ho loja ba distribuisaun voucher iha programa Cesta Bázika. Hein de’it iha tempu badak sei realiza, tanba tempu ba implementasaun programa ne’e to’o dezembru 2020, tanba ne’e ami halo esforsu hotu atu realiza,” Vise-Ministru Turizmu, Komérsiu, Indústria, Domingos Lopes Antunes, ba Agência TATOLI, iha edifísiu MTKI, Mandarin, kinta ne’e.

Tuir governante ne’e, loja ne’ebé maka sei hola parte iha implementasaun programa Governu ne’e identifika ona.

“Loja 12 maka ami identifika ona, iha loja boot no iha mós loja kiik balun, maibé ha’u hanoin loja hirak ne’e la sufisiente tanba abitante iha Dili 300.000 resin,” nia esplika.

Notísia Relevante: MTKI sei prepara seriál úniku ba distribuisaun voucher Cesta Bázika

Tanba ne’e, parte MTKI sei haree no tetu didi’ak tanba la’ós loja hotu iha kapasidade atu fornese produtu Cesta Bázika.

“Loja kiik ne’ebé hola parte iha distribuisaun voucher maka  hanesan Loja Agrikultura, Amigu To’os Nain,  inklui sira ne’ebé fa’an produtu lokál hanesan Acelda,” nia akresenta.

Nia dehan, distribuisaun voucher sei lansa iha dezembru nia laran no daudaun halo hela preparativu ba dadus.

“Ami tenke kuidadu, tanba dadus ne’ebé maka ami implementa sei mosu reklamasaun barak. Parte informátika sira sei serbisu hodi dezembru nia laran povu sei uza voucher ne’e troka ba produtu iha natal no  tinan foun,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here