Produtu Cesta Bázika. Imajen TATOLI/Antónia Gusmão.

DILI, 11 novembru  2020 (TATOLI)—Ministériu Turizmu, Komérsiu no Indústria (MTKI) daudaun kontinua halo preparasaun tékniku, imprime voucher no distribui ba komunidade iha munisípiu Dili hodi troka iha loja ne’ebé Governu indika ona.

“Distribuisaun iha fulan ne’e, tanba introdusaun voucher maka sai prioridade iha kapitál Dili no ami prepara ba ida-ne’e. Agora ami sei halo serbisu administrativu, identifika no prepara didi’ak dadus sira hafoin imprime voucher, maibé molok imprime, tenke iha seriál úniku ba sidadaun hotu,” Tenik Vise-Ministru Turizmu, Komérsiu no Indústria, Domingos Lopes Antes, iha Palásiu Governu, kuarta ne’e.

Notísia Relevante: MTKI identifika loja 10 troka voucher Cesta Bázika iha Dili

Biban ne’e, governante ne’e husu ba públiku atu pasiénsia no tuir prosesu ne’e, tanba programa ne’e sei benefisia ba ema hotu.

“Prova hatudu katak ema balun deskontente, maibé bainhira ami halo distribuisaun produtu iha Metinaro, ema la kestiona maibé kontente bainhira simu,” nia akresenta.

Produtu ne’ebé distribui sei tuir presu merkadu ba munisípiu hotu.

“Presu sasán ne’e iha lei dehan, ema ida 25$ no ba fulan rua $50, tanba ne’e buat hotu tuir presu merkadu. Karik iha kondisaun balun iha Dili presu la hanesan fatin seluk no konta la to’o, tenke aumenta sasán balun atu halo kompleta. Prátika ne’e maka halo iha Metinaro no iha fatin seluk.

Nia mós husu atu komunidade labele espekula presu.

Tuir governante ne’e, programa ne’e loke dalan ba entidade hotu atu kontrola.

“Husik institusaun sira idaidak halo ninia serbisu, Komisaun Antí Korrupsaun bele halo ninia serbisu ho di’ak, ne’e normál no ezekutivu sira serbisu tuir lei no mandatu ne’ebé fó,” nia subliña.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here