Estudante sira halo apresentasaun iha eskola EBC 30 Agostu Komoro hodi komemora loron mundial siensia matematika, Kinta 26 Novembru 2020.Imajen Tatoli/Antonio Goncalves

DILI, 26 novembru 2020 (TATOLI)—Embaixadór Japaun iha Timor-Leste, Kinefuchi Masami, husu ba Estadu no Governu atu dezenvolve maka’as siénsia matemátika iha kuríkulu nasional nune’e bele hanorin estudante sira ho di’ak liután ba futuru.

Embaixador Japaun Iha Timor-Leste, Kinefuchi Masami. Imajen /Google

Kinefuchi Masami hato’o pedidu ne’e bainhira partisipa serimonia aniversáriu Siénsia no Matemátika ba daualu ne’ebé selebra iha Eskola Ensinu Báziku 30 de Agosto Comoro, Dili, kinta ne’e.

Notísia Relevante :TL-Japaun asina akordu kona-ba projetu bolsa estudu ba funsionáriu

“Ha’u fiar katak hasa’e abilidade iha siénsia no matemátika iha nasaun Timor-Leste sei fó impaktu  ba sosiadade én jerál bele uza abilidade hodi promove dezenvolvimentu ekonómiku no sosiál iha nasaun ida ne’e,” Kinefuchi hateten.

Diplomata ne’e re-lembra katak Japaun ninia esperénsia iha tinan barak liubá dezenvolve maka’as iha siénsia matemátika ne’ebe ikus mai apoiu maka’as ba dezenvolve ekonomia nasaun.

“Ha’u espera katak ida ne’e bele fó benefisiu ba estudante eskola primaria sira hodi bele aprende disiplina importante hirak ne’e,” dehan nia.

Iha 2021, Japaun sei prepara materia formasaun ba profesor sira iha siénsia no matematíka.

Kinefuchi Masami, apela ba estudante ensinu báziku, sekundáriu no tékniku vokasionál sira atu aprende barak liután iha siénsia matemátika no enjinária hodi apoiu prosesu dezenvolvimentu nasionál.

“Labele haluha katak buat ne’ebé mak imi aprende ohin loron sei konstrui imi-nia kapasidade ba futuru ida diak liu ba imi-nia an no imi-nia nasaun,” katak nia.

Governu Japaun durante tinan barak ona fó apoiu ba dezenvolvimentu Timor-Leste liliu iha área edukasaun, infraestrutura bázika, rekursu umanu, tanba ne’e sei kontinua fó apoiu tan iha futuru.

Entermuz bolsa estudu, Embaixadór Japaun ne’e dehan oferese ona bolsa estudu no formasaun  ba estudante Timoroan, funsionáriu públiku, FALINTIL-Forsa Defeza Timor-Leste (F-FDTL) no seluk tan purvolta ema 2.000 no sira ne’ebé hetan ona graduasaun kuaze 100.

Notísia Relevante :Japaun Hakarak Fó Bolsa Estudu ba Estudante UNTL To’o Na’in 200

Jornalista : Tomé Amado

Editór:Agapito dos Santos

1 KOMENTÁRIU

  1. Agradese ba senor embaixador nia hanoin. Maibe problema ida iha timor-leste maka profesor balun be hanorin matematika rasik ladun iha kompetensia tanba balu la’os husi area ida-ne’e nian no balu falo la domina duni area ida-ne’e. Ida-ne’e akontese tanba sistema favoritizmu buras tebes iha Ministeriu Edukasaun.

HAKEREK NO HATÁN

Please enter your comment!
Please enter your name here