Embaixador Japaun ba TL, Masami Kinefuchi Asina akordu ho MNEK, Adaljiza Magno.Imajen/Antonio Gonsalves.

DILI, 27 agostu 2020 (TATOLI)-Governu Timor-Leste liuhosi Ministra Negósiu Estranjeiru no Kooperasaun (MNEK), Adaljiza Magno, kinta ne’e asina nota kooperasaun ho Governu Japaun liuhosi Embaixadór Masami Kinefuchi kona-ba projetu bolsa estudu ba Timoroan liliu dezenvolvimentu rekursu umanu (JDS-sigla inglés) ba da tolu.

“Troka nota ohin ne’e kona-ba dezenvolvimentu rekursu umanu liliu ami konvida funsionáriu Estadu nian bele bá estuda iha Japaun,” informa Embaixadór Japaun ba Timor-Leste, Masami Kinefuchi iha Edifísiu MNEK Dili.

Nia dehan to’o oras ne’e, Japaun oferese ona formasaun no bolsa estudu ba Timoroan hanesan estudante no funsionáriu kuaze ema 2.000-resin.

Husi ema rihun-rua-resin ne’e na’in 95 hala’o ona estudu iha universidade sira iha Japaun hodi hetan títulu akadémiku pos graduasaun iha área edukasaun.

Kada tinan Governu Japaun aloka osan millaun $ 1.5 ba programa bolsa estudu, tanba ne’e kontinua konvida funsionáriu públiku sira atu bá estuda iha área mestradu iha nasaun ne’ebá.

“Iha ne’ebé faze primeiru no segundu hala’o ona no hatudu rezultadu ne’ebé pozitivu,” tenik Masami.

Masami Kinefuchi,  hateten iha tinan 2021, Japaun sei fó bolsa estudu ba funsionáriu públiku hamutuk na’in ualu atu bá estuda iha Japaun.

“Ami sei hili ema na’in ualu atu bá estuda iha Japaun tinan oin, ida ne’e hanesan programa ida ne’ebé ami sei kontinua beibeik atu lori Timoroan estuda iha Japaun,” tenik Diplomata ne’e.

Japaun mós durante ne’e fó apoiu ona ba estudante UNTL liliu Fakuldade Enjinária oinsá atu ba estuda mesteradu iha Japaun.

Nune’e mós kada tinan  simu militár Timoroan tama iha Akademia Militár Japaun nian hodi tuir treinamentu. Hosi kooperasaun ne’ebé iha hametin liután lasu amizade entre nasaun rua nian.

“Ha’u fiar ho programa hirak ne’ebé Japaun halo bele hametin liutan ita-nia kooperasaun entre nasaun rua,” nia dehan.

Iha fatin hanesan Ministra Adaljiza Magno, hateten nota kooperasaun ba programa bolsu estudu ne’e fó perioridade liu ba funsionáriu públiku sira iha ne’ebe  Institutu Nasionál Administrasaun Públika (INAP) maka sei halo selesaun.

“Bolsa estudu ne’ebé ita-nia estudante sira hetan konforme balu durasaun tinan ida ou balu tinan rua iha mesteradu nian,” dehan nia.

Programa bolsa estudu ne’e sei konsentra ba área agrikultura, ekonomia, edukasaun no seluk tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here