Embaixadór Austrália iha Timor-Leste, Peter Roberts. Imajen Tatoli/Egas Cristovão

DILI, 26 novembru 2020 (TATOLI) – Embaixadór Peter Roberts kompromete atu hametin nafatin relasaun bilaterál Timor-Leste ho Austrália durante hala’o mandatu nu’udár diplomata iha nasaun ne’e.

Notísia Relevante : Australia prontu ona atu simu tan traballadór Timoroan

“Austrália sei servisu hamutuk nafatin ho Timor-Leste. Hanesan diplomata, ha’u haree de’it ba serbisu hamutuk entre nasaun-rua nian. Ami prontu nafatin apoiu Timor-Leste hodi ajuda dezenvolvimentu ne’ebé la’o hela,” Embaixadór Peter Roberts, hateten, ohin, ba jornalista-sira hafoin hamutuk ho família oferese prezente Natál ba labarik-sira iha Fundasaun Quesadhip Ruak, Taibesi, Dili.

Diplomata ne’e iha esperansa boot katak, kooperasaun entre nasaun-rua sei metin liu tan iha futuru, liuliu sei tulun di’ak liu tan Timor-Leste iha prosesu dezenvolvimentu.

Hanesan reprezentante Estadu Austrália nian, Peter Roberts lakohi fó komentáriu ba prosesu demokrasia ne’ebé la’o iha Timor-Leste, maibé kontinua akompaña situasaun polítika ne’ebé iha.

“Kona-ba prosesu demokrasia iha nasaun ne’e, ha’u labele fó komentáriu, liu-liu kona-ba situasaun polítika,”  Peter Roberts hateten.

Kooperasaun ne’ebé durante ne’e Austrália estabelese no hala’o ho Timor-Leste iha área edukasaun, saúde, fó oportunidade ba Timoroan hodi ba servisu iha Austrália no seluk-seluk tan.

 Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here