Sekretária Jerál Parlamentu Nasionál, Cedelizia Faria dos Santos, hafoin simu karta ezonerasaun hosi PPN, Aniceto Longuinhos Guterres Lopes halo entrevista ho jornalista sira. Imajen TATOLI/Evaristo Soares Martins.

DILI, 24 novembru 2020 (TATOLI)­­­­—Sekretária Jerál Parlamentu Nasionál, Cedelizia Faria dos Santos, ohin, simu karta ezonerasaun hosi Prezidente Parlamentu Nasionál, Deputadu Aniceto Longuinhos Guterres Lopes, hodi haruka Cedelizia Faria dos Santos tenke sai hosi PN. 

Ba karta ezonerasaun refere, Cedelizia Faria dos Santos sei husu justisa no sei lori kazu ne’e ba  tribunál tanba nia asume pasta sekretária jerál Parlamentu Nasionál liuhosi prosesu rekrutamentu. 

“Ha’u foin simu karta ida hosi Prezidente Parlamentu Nasionál maizumentu tuku 10.30 dadersan. Iha despaxu Prezidente Parlamentu Nasionál nian ne’e dehan, oin kedas ha’u tenke sai hosi parlamentu. Orsida ha’u sei entrega karreta sira-ne’e. Iha karta hatete buat balu, liuliu akontesimentu sira iha 18 no 19 maiu 2020 liubá no ahi mate derrepente iha PN ne’e. Maibé ba-oin ha’u sei lori kazu ne’e hanesan sidadaun ba tribunál nune’e tribunál mak bele hatete loloos sé mak sala no sé mak loos. Ha’u sei lori ba tribunál tanba akuzasaun sira hasoru ha’u ne’e falsu. Ita-nia konstituisaun mós fó dalan, ha’u sei buka lialoos ba kazu ne’e,” Cedelizia Faria dos Santos informa ba Ajénsia TATOLI liuhosi telefónika, tersa ne’e.

Cedelizia Faria dos Santos hateten, nia sei haree hela prosesu ne’e no sei analiza hela karta ne’e hafoin mak informa ba públiku. Nia deside atu lori ba tribunál tanba asume pasta sekretária jerál Parlamentu Nasionál liuhosi prosesu rekrutamentu.

“Ha’u kompleta prosesu tomak mak ha’u tama iha-ne’ebá. Ha’u la’ós hetan nomeasaun hosi partidu polítiku. Ha’u sente ladún justu tanba karta ne’e ohin dehan ha’u tenke sai hosi parlamentu. Ha’u sente seidauk halo krime ruma,” nia lamenta.

Cedelizia dehan, nia parte mai hosi jerasaun ne’ebé funda nasaun ne’e maibé sente triste ho ezonerasaun ne’e tanba ezonerasaun ne’e la fó tempu.

Cedelizia Faria dos Santos asume Sekretária Jerál Parlamentu Nasionál iha loron 13 fulan-setembru tinan 2019 liubá.

Notísia Relevante: Cedelizia Simu Pose ba Sekretária Jerál Foun PN

Jornalista: Evaristo Soares Martins

Editór: Cancio Ximenes

2 KOMENTÁRIU

  1. sira la komprede saida rekrutamentu no saida mak nomeasaun husi partidu, mana hare lori ba tribunal mak deside deit, ida ne’e hanesan sasukat ida ba mana, durante ne’e sira rai odiu hela mana no sira ezonera mana para sira nomea fali sira nia ema sira husi sira nia partidu laran ou sira nia familia.

  2. Timor tenki ba oin, maibe laos ho meus sira nune. Ema hotu iha direito ba rai ne tamba ne labele uja poder hodi halo terus maluk seluk. Mana ne tama liu husi proseso rekrutamento tamba ne presija konsidera. Se nia iha salah halo uluk samada ou lao tuir proseso laos derepento ezonera ema tuir ita nia gosto deit.
    Poder laos sasukat atu hanehan ema seluk…..

HAKEREK NO HATÁN

Please enter your comment!
Please enter your name here