Sekretária Jerál Foun Parlamentu Nasionál, Cedeliza F. dos Santos. Imajen: TATOLI

DILI, 13 setembru 2019 (TATOLI) – Prezidente Parlamentu Nasioná l(PN), Arão Noé de Jesus da Costa Amaral akompaña hosi Prezidente Komisaun Funsaun Públika (KFP), Faustino Cardoso, sesta ne’e, iha PN, fó pose ba Sekretária Jerál Foun PN, Cedelizia Faria dos Santos, hodi troka Sekretáriu Jerál Sesante, Adelino Afonso de Jesus.

Iha nia diskursu, Arão Noé hato’o sekuénsia rekrutamentu katak rekrutamentu ne’e bazeia ba Lei Organizasaun Funsionamentu Administrasaun Parlamentár (LOFAP) artigu 23 to’o 24 ne’ebé iha opsaun rua ba rekrutamentu ne’e.

Opsaun rua ne’e mak nomeasaun hosi funsionáriu públiku ne’ebé asume kargu xefia aas liu iha PN no opsaun seluk mak loke konkursu públiku.

Sekretáriu Jerál Sesante PN, Adelino Afonso de Jesus (loos), entrega termu serbisu ba Sekretária Jerál Eleita PN (karuk), Cedeliza F. dos Santos. Imajen: TATOLI

Bazeia ba LOFAP ne’e mak Konsellu Administrasaun liuhusi reuniaun foti desizaun hodi opta loke konkursu públiku iha abríl liubá no ohin realiza pose ba Sekretária Jerál eleita.

Sekretária Jerál ne’ebé simu pose, ninia estatutu la’ós atu sai funsionária públika, tanba ninia karáter nomeasaun polítika nafatin no ninia prosesu mak tuir konkursu públiku.

Tanba ne’e, ninia mandatu sei hala’o durante tinan lima hanesan mós ho mandatu Prezidente Parlamentu Nasionál.

Tuir planu, Cedelizia sei hahú hala’o kna’ar iha segunda (16 setembru) tinan nee to’o ramata, ho kna’ar prinsipál atu asegura Funsionamentu Administrasaun PN nian.

Arão husu atu mantein haforsa programa no planu sira ne’ebé durante ne’e la’o ona, hametin liután kooperasaun ho parseiru nasionál no internasionál, ne’ebé durante ne’e fó apoiu ba PN.

Arão promete katak durante nia mandatu nu’udar Prezidente PN, sei husu ba administrasaun atu hametin no aumenta frekuénsia no intensidade formasaun ba funsionáriu PN, nu’udar parte hosi kapasitasaun rekursu umanu, nune’e bele fó apoiu ba deputadu sira ho objetivu ba serbisu PN nian.

Nia hameno mós ba Cedelizia atu hadi’a liután kestaun disiplina serbisu nune’e buat hotu kontribui másimu ba rai no povu TImor-Leste.

Iha okaziaun ne’e, Prezidente PN ne’e agradese mós ba Sekretáriu Jerál Sesante, Adelino Afonso de Jesus ne’ebé durante ne’e serbí no halo kna’ar di’ak tebes iha Administrasaun Parlamentár.

Nia husu atu eis Sekretáriu Jerál ne’e nafatin fó kontribuisaun, kolabora ho estrutura foun administrasaun nian, nune’e hamutuk asegura serbisu PN hodi serbí povu no nasaun.

Nune’e mós, Prezidente Komisaun Funsaun Públika,  Faustino Cardoso konsidera serimónia ne’e ki’ik, maibé ho nia sentidu aas.

Tanba, hanesan Sekretária Jerál, iha responsabilidade boot ba serbisu administrasaun tuir orientasaun Prezidente PN ho Konsellu Administrasaun nian.

Faustino mós konsidera katak kna’ar nu’udar Sekretária Jerál, Diretór Jerál no Diretór Nasionál hanesan xave fundamentál ba andamentu serbisu administrasaun públika nian.

Tanba ne’e, Faustino husu Sektetária Jerál emposada atu asegura serbisu hotu iha PN ho responsabilidade no korajen.

Iha fatin hanesan, Sekretária Jerál Foun, Cedelizia Faria dos Santos konsidera kna’ar ne’e hanesan responsabilidade boot ne’ebé nia asume iha Uma Fukun ida ne’e.

Nia promete sei serbisu hamutuk ho parte hotu iha Uma Fukun, atu serbí povu liliu kontinua buat ne’ebé Sekretáriu Jerál Antigu sira hala’o ona, liga ho planu no orsamentu PN nian, bazeia ba regulamentu ho responsabilidade tomak.

Aleinde ne’e, Sekretáriu Jerál Sesante, Adelino Afonso de Jesus deklara prontu serbisu hamutuk ho Sekretária Jerál Foun no propoin atu dezenvolve di’ak liután planu no programa PN nian durante mandatu.

Partisipa iha tomada pose ne’e mak hanesan vise Prezidente PN, Angelina Maria Sarmento, Sekretáriu Estadu Komunikasaun Sosiál, Merício Akara, deputadu sira, Reitór Semináriu Menór Nossa Senhora de Fátima Balide, Pe. Angelo Salsinha, kargu xefia sira no funsionáriu PN inklui mídia.

Iha serimónia ne’e mós Prezidente PN, Arão Noé entrega sertifikadu rekoñesimentu ba Sekretáriu Jerál Sesante, Adelino Afonso de Jesus.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here