Arguidu MS. Imajen/PNTL

DILI, 23 outubru 2020 (TATOLI)- Tribunál Distritál Dili (TDD) liuhosi prosesu primeiru interrogatóriu, domingu (22/11), aplika medida prizaun preventiva ba arguidu ho inisiál MS  ne’ebé  taa nia espoza  iha Hera, foin lalais ne’e.

Notísia Relevante : MS taa nia espoza iha ulun to’o liman-fuan kotu hotu

Arguidu MS kumpre ona detensaun oras 72  iha sela Eskuadra Polísia Becora, Dili, bainhira polísia halo fragante deleitu.

Tribunál aplika prizaun preventiva ba arguidu MS tanba  Tribunál haree katak iha indísiu forte ba envolvimentu arguidu nian ba kazu  ne’e  hodi taa kanek nia espoza rasik hodi asegura prosesu investigasaun tuir mai.

Ministériu Públiku (MP)   akuza arguidu MS ba krime tolu hanesan  tentativa omisídiu, arma branka ho maustratu.

Audiénsia primeiru interrogatóriu ne’e  prezide hosi juiz  prosesu Evangelino Belo, Ministériu Públiku reprezenta hosi Prokuradór Renato Bere Nahac no arguidu hetan asisténsia legal hosi advogadu privadu.

Vítima oras ne’e kontinua hala’o tratamentu intensivu iha Ospitál Nasionál Guido Valadares (HNGV) tanba sofre manek maka’as iha ulun, oin, kotuk-laran, liman-fuan kotu no kelen-sira tanba hetan taa hosi arguidu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here