Polísia Eskuadra Kristu Rei, Munisípiu Dili, detein suspeita MS ne’ebé taa nia espoza AP. Imajen PNTL/Dok

DILI, 20 novembru 2020 (TATOLI)- Polísia Eskuadra Kristu Rei, Munisípiu Dili,  hamutuk ho Konsellu Polisiamentu Komunitáriu (KPK) no Ofisiál Polísia Suku (OPS) foti aktu represivu hodi detein suspeitu MS tanba taa nia espoza APP iha ulun no liman-fuan parte karuk kotu hotu.

Informasaun balun ne’ebé iha katak suspeitu MS hola asaun radikál no krime ne’e tanba de’it suspeitu MS deskonfia nia espoza APP halo fali “kama-rua” ho terseira pesoa.

Kazu maustratu ba konjuga ho tentativa ne’e akontese iha  Aldeia Mota Ki’ik, Suku Hera, Postu Administrativu Kristu Rei, Munisípiu Dili, kinta (19/11), tuku 15:25  Otl.

Segundu Komandante PNTL, Munisípiu Dili, Superintendente Euclides Belo, ba jornalista iha Komandu PNTL, Caicoli, Dili, ohin,  informa vítima APP  daudaun ne’e halo tratamentu intensivu iha Ospitál Nasionál Guido Valadares  (HNGV).

“Ita sei halo hela investigasaun, mezmu kazu ne’e ninia prosesu balun ami rekolla ona hodi hein mós vítima rekupera no foti dadus hosi sasin balun,” Euclides Belo hateten.

Kondisaun vítima nian oras ne’e kontinua submete ba tratamentu intensivu tanba kanek maka’as no tenke opera tiha vítima nia matan sorin tanba bainhira vítima koko salva-a, hodi haksoit hosi janela maka vidru janela nian rahun hodi sona vítima nia matan.

Superintendente Euclides Belo mós hato’o agradese ba ninia membru polísia sira ne’ebé halo atuasaun ho lalais no garante nafatin seguransa iha fatin akontesimentu.

Jornalista   : Eugénio Pereira

Editór          : Francisco Simões

HAKEREK NO HATÁN

Please enter your comment!
Please enter your name here