Vítima na’in-tolu nia fotografia ne’ebé sai hanesan evidénsia ida hodi aprezenta ba Komandu Jerál PNTL. Imajen/espesiál

DILI, 17 novembru 2020 (TATOLI) – Komandu Jerál Polísia Nasionál Timor-Leste (PNTL) simu ona keixa hosi família ida ne’ebé deskonfia hetan torturasaun no ameasa hosi Inspetór Polísia ida ho inisiál MS.

Vítima Gabriel da Cruz . Imajen Tatoli/Eugénio Pereira

Vítima Gabriel da Cruz akompaña hosi nia família sira, ohin, hakat mai resintu Komandu Jerál PNTL hodi aprezenta keixa ba Komandante Jerál PNTL, Komisáriu Faustino da Costa, kona-ba aktu violénsia no agrsaun fizíku ne’ebé membru PNTL ida halo ba sira.

Kazu ne’e akontese iha loron 9 novembru 2020, tuku 12:00 Otl. suspeitu membru polísia MS ho nia kolega na’in-tolu ho karreta hilux metan ida halo asaltu ba vítima nia uma iha Aldeia Mulo, Suku Mulo, Postu Administrativu Hatu-Builico, Munisípiu Ainaro, ho ropa sivíl lori pistola ameasa tiru no baku vítima ho nia kaben, Domingas P.A. Sarmento no nia oan-mane Vicente Caldas Sarmento da Cruz.

“Suspeitu lori pistola baku ha’u iha uma laran, no rasta ha’u sai to’o li’ur. Sira baku nafatin to’o ha’u labele ona, depois ha’u nia feen rasta tiha sira na’in tolu, no ha’u halai sai kedas ba subar iha kafé laran. Maibé sira na’in tolu kontinua baku nafatin ha’u nia feen no ha’u nia oan mane,” vítima Gabriel da Cruz, hateten ba jornalista hafoin hato’o keixa ba Komandu Jerál PNTL iha Kuartél Jerál PNTL, Caicoli, Dili.

Agresaun fíziku espontánea ne’e rezulta vítima nia tilun-hun karuk no isin lolon bubu no kanek maka’as. Vítima nia kaben Domingas no nia oan-mane, Vicente mós  sofre kanek maka’as.

Vítima husu ba Komandu Jerál PNTL atu loke investigasaun ba membru polísia ne’e hodi prosesa kazu tuir lei disiplinár PNTL nian.

Vítima rasik to’o agora la hatene razaun no motivu loloos hosi asaun violénsia fízika  ne’ebé suspeitu halo hasoru nia no nia família.

“Nia baku tiha ami, nia ameasa tan dehan, imi ba kesar se de’it, ha’u sei la ta’uk. Ami mós la hatene razaun saida mak nia baku ami, tanba durante ne’e ami nunka halo problema ho nia no nia família,” vítima Gabriel lamenta.

Iha tempu hanesan, vítima lori mós keixa ne’e ba hato’o iha Provedoria Direitu Umanu no Justisa (PDHJ), Komandu PNTL Ainaro, no Organizasaun Naun Governmental Luta Hamutuk.

Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

Iha parte seluk, Portavós PNTL, Superintendente Xefe, Arnaldo de Araújo dehan, sira-nia parte sei estuda keixa ne’ebé hato’o hosi vítima hodi loke  investigasaun ba kazu krime ne’e.

“Keixa ne’e foin tama, ami sei haree, tanba se polísia kuandu halo atuasaun tenke professional, labele lori arma ameasa fali ema ida, tanba lei PNTL klaru, se ema ida utiliza arma la tuir prosedimentu, ami nia lei dixiplina sei fó sansaun,” hateten Armando.

Komandante Arnaldo husu ba vítima atu koopera ho PNTL hodi prosesu kazu ne’e tuir lei dixiplinár PNTL nian.

Nia hatutan, parte Komandu Jerál sei kontaktu PNTL Ainaro hodi aprezenta dadus investigasaun hodi buka hatudu lia loos entre vítima no suspeitu ne’ebé hala’o asaun.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here