Ministeriu Saude halo vasinasaun ba sidadaun kona-ba prevensaun moras hada'et hepatitis B. imajen/Felicidade Ximenes.

DILI, 23 novembru 2020 (TATOLI)—Ministériu Saúde (MS), iha segunda ne’e, lansa ona programa vasinasaun hepatitis B ba sidadaun ho kategoria risku atu hetan moras refere hanesan homo seksuál, transgender,  pesoál Polisia Nasionál Timor Leste (PNTL), FALINTIL-Forsa Defeza Timor Leste (F-FDTL) no pesoál saúde sira rasik.

”Lansamentu hepatites B ne’ebé mak ita halo ne’e ba ona iha terseira doses tanba durante ita hala’o uluk ona primeiru no segundu doses ne’ebé mak hala’o ikus iha fulan-marsu to’o setembru 2020 nian,” dehan Diretora Nasionál Kontrolu Moras, Ministériu Saúde, Josefina Clarinha João, ba jornalista sira iha Asosiasaun HAK Faról Dili, segunda ne’e.

Notísia Relevante :Vasina Hepatitis Nu’udar Meiu Prevene Moras

Durante ne’e, nia dehan MS halo promosaun saúde maka’as liu foka ba iha área HIV/SIDA, tubercoluse ka TBC, no moras hada’et sira seluk kompara ho hepatitis menus liu.

“Hepatitis nia posibiliadde da’et lalais liu kompara ho HIV/SIDA nia transmisaun ne’ebé mak hada’et mak liuhusi relasaun seksuál maibé hepatitis liuhusi kontaktu kulit ba kulit entaun ida ne’e aumenta liutan posilibidade hepatitis nian,” tenik tan.

Moras hepatitis iha kategoria A, B,C,D no E. Transmisaun hepatitis A no E liuhusi kontamisaun ambientál hanesan konsumu hahán la seguru, B no C da’et liuhusi relasaun seksuál no liuhusi troka daun ne’ebé kontamina ona ho moras hepatitis fasil atu da’et ba ema seluk.

Ministériu Saúde iha planu atu halo mós rastreiu ka screening masal ba populasaun hodi halo prevensaun tanba moras hepatitis B seidauk iha ai-moruk atu halo kurativu.

Iha fatin hanesan Xefe Unidade HIV/SIDA Ministériu Saúde, Bernardino da Cruz, tuir dadus 2019 ne’ebé maka forñese husi Sentru Saúde, Banku Sangue no Laboratóriu Nasionál rejista pasiente hepatitis  hamutuk 892 no sira halo tratamentu ho di’ak no la rezulta ema mate.

Notísia Relevante :Labarik Idade 0-6 Tenke Hetan Vasina

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here