Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 23 novembru 2020 (TATOLI)—Ministériu Ensinu Superiór Siénsia no Kultura (MESSK), segunda ne’e ofisialmente abertura programa teste ba kandidatu asesu Universidade Nasionál Timor Lorosa’e (UNTL) no Institutu Politékniku Betano (IPB) iha territóriu Timor-Leste ba tinan letivu 2021 hamutuk ema na’in 6.710.

Ministru Ensinu Superiór Siénsia no Kultura, Longuinhos dos Santos, hateten husi kandidatu 6.710 ne’e prienxe ona vaga husi rejime espesiál hodi konkore ba vaga rejime espesiál hamutuk 1.296.

Notísia Relevante :Governu deside ona totál vaga 910 ba oan ki’ak asesu UNTL

“Ezame ne’e ita realiza ba Munisípiu hotu inklui Rejiaun Administrativa Espesiál Oe-Cusse Ambeno,  rejime espesiál mak ohin hahú ona ezame ita fó liu oportunidade ba veteranu nia oan, ofisiál PNTL no F-FDTL, kbi’it la’ek no estudante sira ne’ebé mak la konsege asesu ba ensinu superiór iha tinan kotuk,” dehan Governante hafoin halo abertura ba programa ne’e iha Fakuldade Ekonomia UNTL Caicoli, segunda ne’e.

Tuir planu UNTL no IPB iha tinan 2021 sei simu estudante foun hamutuk 4.320, IPB sei simu estudante finalista ema na’in 300 no UNTL ema na’in 4.020.

Ministru Longuinhos dos Santos, enkoraja ba kandidatu sira atu aproveita teste ne’e ho  di’ak atu nune’e bele pasa iha ezame para asesu UNTL no IPB.

“Ha’u enkoraja kandidatu sira hotu iha territóriu Timor-Leste dezeju ba imi hotu iha ezame ne’ebé mak realiza ona ohin, ha’u husu ba imi hotu atu konsentra hodi tuir ezame ho di’ak,” nia apela.

Entretantu, ezame ba kandidatu asesu Universidade Nasionál Timor Lorosa’e no Institutu Politékniku Betano sei hala’o durante loron tolu hahú loron 23 to’o 25 fulan-novembru iha territóriu Timor-Leste.

Notísia Relevante :Asesu UNTL, MAKLN propoin vaga ba veteranu nia-oan 1.300

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here