Ekipa Tatoli feminina (hamriik) foto hamutuk ho ekipa Lafaek Newsa (tuur) bainhira partisipa iha torneiu Futsal MAPKOMS iha kampu Futsal Bebora, Dili. Jogu entre ekipa rua, Tatoli manan Lafaek News 3-0. Imajen Tatoli/ António Gonçalves

DILI, 21 novembru 2020 (TATOLI) – Iha kontinuasaun torneiu futeból salaun (Futsal) Ministériu Asuntu Parlamentár no Komunikasaun Sosiál (MAPCOMS), ohin loraik, iha faze oitavu finál, ekipa feminina Agência Noticiosa de Timor-Leste, TATOLI.IP “hakoi” esperansa Lafaek News ho golu 3-0.

Notísia Relevante : Torneiu futsal MAPKOMS: Ekipa feminina TATOLI hakat ba oitavu finál

Iha minutu primeiru jogu ne’ebé hala’o iha Kampu Futsal Bebora, Dili, ekipa Lafaek  News ne’ebé lidera hosi Maya M.J.G (11) ho Etavina D.S (13) halo kontra atake maka’as ba iha ekipa TATOLI ne’ebé lidera husi Maria Auxiliadora (7).

Apresiasaun no suporta maka’as hosi adeptu ekipa rua nian, hanesan espíritu enerjia hodi halo jogadora-sira jogu ho tátika kontra atake.  Maske nune’e, ekipa Tatoli sempre “matan moris neon nain” hodi haree oportunidade leet hodi bele halo golu no haku’ur liu defeza Lafaek News nian ne’ebé komanda hosi Juvita dos Santos (12).

Ho tátika TATOLI nian ne’e, ikus mai kapitaun Tatoli hetan bola hodi pasa direta kedas ba avansadu Celestina X (10) lansa golu ba guarda rede Lafaek News, Sabina B Clara (8) hodi hatuur score 1 – 0.

Iha minutu 10, kapitaun TATOLI, Maria Auxiliadora (7) lansa tan golu ida ba Lafaek News. Nune’e, iha jogu primeira parte Tatoli lidera kedas ho golu 2-0.

Hakat ba jogu segunda parte nian, ekipa TATOLI ne’ebé mak lidera hosi estrela jogadora Celestina M (10) no Maria Auxialiadora (7) kontinua halo presaun maka’as iha area penalidade Lafaek News nian. Maibé, ekipa Lafaek News nia defeza ne’ebé komanda hosi Juvita dos Santos (12) ho halo ekipa TATOLI difisil  marka golu.

Jogadora Lafaek News nain, Maya M.J.G (11) ho Etavina D.S (13) kontinua halo ameasa oioin ba area penalidade TATOLI nian. Maibé defeza TATOLI nian ne’ebé komanda hosi Sandra Bonaparte (6) hatudu ninia performance di’ak tebes hodi salva bola oioin no taka metin jogadora-sira Lafaek News atu lansa suta livre ba guarda rede TATOLI nian iha area penalidade.

Iha minutu 9 jogu segunda parte nian, jogadora substitui ekipa TATOLI, Felecidade Ximenes, marka tan golu ida hodi dudu score TATOLI nian ba 3-0. Nune’e,   Lafaek News hela ona iha faze oitavu final no TATOLI obrigadu tenke hakat ba faze tuir mai.

Jornalista   : Domingos Piedade

Editór        : Francisco Simões

HAKEREK NO HATÁN

Please enter your comment!
Please enter your name here