Ekipa feminina TATOLI hasoru ekipa Mandiri, domingu (15/11). Imajen TATOLI/António Gonçalves

DILI, 15 novembru 2020 (TATOLI)–Iha terneiu futsál Ministériu Asuntu Parlamentár no Komunikasaun Sosiál (MAPKOMS) iha domingu ne’e, ekipa feminina Agência TATOLI konsege hakat ba oitavu finál, hafoin empata hasoru ekipa banku Mandiri (1-1).

Iha torneiu ne’e husi ekipa feminina, TATOLI lidera ho skor ikus 10 husi jogu dala-lima, enkuantu Mandiri labele avansa ba jogu tuir mai tamba lakon dala-ida, manan dala-ida no empata dala-ida.

Ekipa TATOLI ne’ebé lidera husi kapitaun Maria Auxiliadora (7) halo kontra atake maka’as ba adversáriu ne’ebé lidera husi kapitaun Bhelia Idiana (17).

Ekipa rua ho idaidak ninia estrategia, no ekipa Mandiri halo kontra atake ba guarda rede TATOLI ne’ebé komanda husi Imelda D. (20), ne’ebé mak labele salva bola husi estrela jogadora Graça Elanora (4) no konsege marka golu iha minutu 4, nune’e ekipa Mandiri lidera iha jogu dahuluk.

Maski nune’e, estrela jogadora TATOLI, Celestina Menezes (10) no Maria Auxialiadora (7) halo presaun maka’as iha área penalidade, maibé ekipa Mandiri ninia defesa ne’ebé komanda husi Clara Mónica (10) halo ekipa TATOLI labele marka golu to’o jogu dahuluk ramata.

Maibé, tama ba jogu daruak, kapitaun Maria Auxiliadora (7) konsege halo golu iha minutu 12, liuhosi bola kona liman ‘Hand Ball’ Clara Mónica (10) iha área Mandiri.

Jogadora Graça Elanora (4) no Claudia Emanuel (6) halo kontra atake oin-oin, maibé la konsege hatama golu, tanba defeza Tatoli, Alexandrina Bonaparte (6) halo ekipa Mandiri labele lansa golu.

Iha minutu minutu ikus, ekipa rua hatudu jogo bonito no halo kontra atake maka’as maibé la rezulta tan golu hodi ikus mai empata.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here