Ministru Edukasaun Juventude no Desportu, Armindo Maia.Imajen/Antonio Goncalves

ERMERA, 21 novembru 2020 (TATOLI)–Governu liuhosi Ministru Edukasaun Juventude no Desportu (MEJD), Armindo Maia, hateten MEJD sei hadi’a sala-de-aula hamutuk 91 iha Munisípiu Ermera.

Notísia Relevante: Governu Sei Tau Atensaun Hadi’a Sala-de-Aula 1000 Resin

“Ba Munisípiu Ermera de’it ita sei hadi’a sala-de-aula hamutuk 91 ne’ebé la inklui kaza-de-bañu no sala ba profesór sira,” Armindo Maia hateten ba populasaun Ernera iha diálogu entre Prezidente Repúblika ho populasaun Ermera iha salaun parókia Gleno, Ermera, foin lalais ne’e.

Governante ne’e mós dehan, la’ós halo konstrusaun no reabilita de’it sala-de-aula iha Munisípiu Ermera maibé iha munisípiu hotu ne’ebé kuaze sala-de-aula presiza hadi’a ka reabilita hamutuk liu 800.

“Aula sira ne’ebé atu halo instala foun no reabilita iha teritóriu Timor-Leste laran tomak liu 800 ne’ebé iha 2021 la konsege rezolve hotu iha 2022 bele kontinua tan,” nia dehan. 

Ministru ne’e mós otimista katak bainhira ramata nia mandatu iha Governu daualu ne’e tenke halo konstrusaun no reabilitasaun ba sala aula hamutuk 1.500.

Entretantu, orasamentu ne’ebé prevee ba konstrusaun no reabilitasaun ba sala-de-aula sira iha territóriu Timor-Leste inklui Munisípiu Ermera nian seidauk fixu tanba sei iha Parlamentu Nasionál (PN).

Alende ne’e tuir livru panorama ornamentál 2021 nian ne’ebé governu liuhusi Ministériu Edukasaun Juventude no Desportu (MEJD) hetan iha tokon $111.478,489 ne’ebé sei aloka ba Saláriu no Vensimentu (SV) tokon $61.628.121, Bens no Servisu (BS) tokon $16.650.131, Kapitál Menór (KM) tokon $2.995.700, Kapitál Dezenvolvimentu (KD) tokon $7.015.951 no Transferénsia Públika (TP) tokon $23.188.556.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here