Ministra Edukasaun, Juventude no Desportu Dulce de Jesus Soares. Imajen/TATOLI

DILI, 16 dezembru 2019 (TATOLI)—Ministra Edukasaun, Juventude no Desportu (MEJD), Dulce de Jesus Soares, hateten nia parte halo ona identifikasaun kuaze sala-de-aula rihun rua resin ne’ebé MEJD tau iha asuntu prioridade maibé iha sala la to’o rihun ida resin mak presiza urjentemente atu tau atensaun lalais.

“Signifika rihun ida resin sala-de-aula ne’ebé la tama iha identifikasaun bele dehan ninia kondisaun di’ak atu bele aselera hela prosesu ensinu aprendijazen. Ha’u konkorda katak iha sala de aulas rihun rua resin mak sei sai problema. Dala ruma alunu sira sei butuk iha sala ida tanba kadeira no meza la sufisiente. Maibé ha’u la konkorda kestaun ida ne’e sai razaun ba profesór sira,” dehan Dulce de Jesus Soares ba jornalista sira iha salaun INFORDEPE Matadoru, segunda (16/12/2019).

Nia hatutan, la’ós sala de aula rihun rua resin ne’ebé tuir planu MEJD nian atu hadi´a to’o 2023 ne’e sai prioridade dahuluk tanba iha sala de aula barak liu mak kondisaun sei di’ak hela. Ne’eduni, tuir nia, formasaun ba profesór sira kada tinan sempre realiza ho intensaun atu ajuda labarik sira hodi hetan sira-nia dezempeñu.

Entretantu, nia informa, livru sira ne’ebé kads tinan Ministériu sempre imprime hodi fahe ba eskola mezmu seidauk sufisiente maibé neineik-neineik atu bele kompleta buat ruma. Tanba, nu’udar membru Governu ne’ebé tutela hodi xefia ME ne’e hakarak eziji ba ema hotu atu hala’o idaidak nia servisu ho responsalblidade.

“Ha’u haree ha’u nia parte, ita-boot sira haree parte ita-boot sira nian. Atu nune’e, ita hotu bele kompleta malu hodi lori edukasaun Tior-Leste hetan progresu ida di’ak liu,” nia dehan.

Notísia relevante:2020-2023, Governu Hadi’a Sala-de-Aula 2.000

Jornalista: Tomé Amado
Editór     : Rafy Belo

HAKEREK NO HATÁN

Please enter your comment!
Please enter your name here