Eis Ministru Agrikultura no Peska, Estanislau Aleixo da Slva. marka prezensa iha TDD. Imajen Tatoli/Dok

DILI, 20  novembru 2020 (TATOLI)- Tribunál  Distritál Dili (TDD), ohin, kontinua rona sasin ka testemuña-sira ba  kontestasaun hosi parte rekerente  kontra desizaun eis Ministru Agrikultura no Peska (MAP), Estanislau Aleixo da Silva, ne’ebé hasai desizaun ezonera  prezidente Ajénsia Espesializada ba Investimentu (AEI),  Felisberto Araújo Duarte  iha 2015.

Notísia Relevante : “Ezonera” prezidente AEI, eis ministru Estanislau hatán iha Tribunál

Prosesu sivíl ne’ebé parte rekerente (vítima) liuhosi nia advogadu privadu, Pedro Aparício Guterres, maka halo kontestasaun hasoru Estadu ne’ebé relasiona ho desizaun eis Ministru Estanislau Aleixo da Silva, no hosi Ministériu Públiku  (MP) liuhosi Prokuradór Pascásio de Rosa Alves reprezenta nu’udar Estadu.

Hosi parte rekerente halo kontestasaun hasoru desizaun eis Ministru MAP no  mós eis  Ministru Koordenadór ba Asuntu Ekonómiku (MECAE)  ne’ebé halo iha loron 30  juñu 2015.

Ajénsia AIE nu’udar instituisaun Estadu ne’ebé haree mós ba asuntu investimentu ne’ebé tutela direita ba iha MECAE iha governasaun momentu liubá.

Parte rekerente halo petisaun  la aseita ho desizaun ne’e tanba konsidera desizaun polítika la’ós haree ba legalidade, tanba lei ne’ebé mak aplika tuir estatutu Ajénsia ne’e nian iha artigu 15 iha buat tolu hateten ba jestór-sira ne’ebé asume funsaun   hanesan; dahuluk prazu termina ona, daruak kuandu rezigna-an no ikus kuandu prezidente  halo infrasaun ida ne’e boot.

Lei  ne’e mós hateten, kuandu hasai liuhosi prosesu inkéritu hodi notifika hafoin nia iha direitu atu defende-an.

Ba  nomeasaun prezidente AEI  mós fó kompeténsia membru Governu tutela ba Ajénsia ne’e bele halo nomeasaun livre eskolla  no lei ne’e iha baze fó kontratu tuir lei laborál. Tanba ne’e, parte rekerente hatama prosesu ne’e ba Tribunál atu halo anulasaun ba desizaun ministru nian.

Tuir kontratu  ne’ebé antes ne’e iha  eis AEI, Felisberto Araújo Duarte hetan nomeasaun  asume kargu  refere durante tinan lima (2015-2020), maibé foin hala’o kna’ar fulan-neen, eis  Ministru Estanislau Aleixo da Silva  hola desizaun hodi hasai ka ‘ezonera’ tiha.

Liuhosi audiénsia julgamentu ne’e Tribunál rona sasin hosi parte  rekeridu (Reu) ninian.

Sasin ho inisiál JYRB, hahú iha april 2015 servisu nu’udar  pontu fokál iha  Ministériu Koordenadór ba Asuntu Ekonómiku (MECAE) ho kna’ar servisu mak  fasilita no koordena iha Ajénsia autónoma-sira ne’ebé tutela ba ministériu-sira hanesan AEI, IADE no SERVE.

Nia konfesa ba Tribunál katak, normálmente tuir nia hatene momentu ne’ebá  ministru tutela konvoka enkontru ho Ajénsia autónoma-sira  ne’ebé tutela ba ministériu, inklui AEI rasik hodi halo enkontru hato’o relativamente ba progresu  servisu-sira no planu-sira ba oin atu kontinua.

Hatán kona-ba iha enkontru eis ministru tutela koloka pergunta balun ba eis prezidente AEI  kona-ba atividade servisu atu aprezenta dokumentu no  relatóriu-sira ba eis prezidente la kolabora, nia  lia-tun dehan, nia parte la hatene tanba enkontru ne’ebé hala’o dalaruma partisipa no la partisipa.

Sasin seluk ho inisiál  MJFF  nu’udar sekretária ba Prezidente sesante AEI iha 2015, hateten, nia parte iha  koñesimentu kona-ba matéria faktu ba rekrutamentu ne’ebé AEI hala’o   liuhosi anúnsiu vaga hodi loke konkursu  públiku no momentu ne’ebá selesiona ema-nain haat hodi servisu iha AEI rasik, hafoin ne’e prezidente sesante rasik  fornese informasaun ba ministru tutela.

Sasin balun tan ADS, nu’udar Xefe Unidade Koordenasaun Téknika iha MECAE  iha april 2015, fó sasin mós katak, normálmente momentu ne’ebá iha reuniaun lubuk mak eis ministru Estanislau Aleixo hala’o ho dirijente másimu hosi instituisaun tutela ne’ebé partisipa mós hosi kargu  xefia sira.

Nia friza katak, iha 2015 iha reuniaun (loron la apuradu) eis ministru husu pergunta perante iha reuniaun hodi husu  responsavel ba prezidente AEI kona-ba dokumentu no relatóriu liga ba atividade  servisu nian.

“Ministru Estanislau husu maibé ha’u la lembra ona tanba kleur agora halo tinan lima ona, no iha reuniaun ne’e mós ministru dehan ba prezidente AEI labele jere AEI hanesan instituisaun privada,” nia haktuir.

Nia hatutan, nune’e mós iha reuniaun tuir mai  loron la apuradu eis ministru Estanislau Aleixo husu eis prezidente AEI atu  voluntária atu rezigna-an duke halo destituisaun.

“Hafoin  ne’e iha reaje hosi eis prezidente AEI  nia sai altura ne’ebá nia kopia tau ha’u nia foto  ho ministru nian  iha Facebook trata hasoru ho nune’e ha’u ba direita nia uma hodi husu nia tanbasá halo nune’e  nia dehan husu ba iha Facebook,’’ sasin ADS hateten.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here