DILI, 19 novembru 2020 (TATOLI) – Ekipa Ramelau FC susesu “hurulele” AD Samoro ho rezultadu 4-1.
Notísia Relevante : Pra Liga Futsal TL, Kuda Ulun manan mihis M-VDL Lahane 5-4
Iha jogu kontinuasaun Pra Liga Futsal Timor–Leste ba segunda jornada ne’ebé hala’o ohin kalan iha kampu Futsal Kuartél Jenerál FALINTIL-Forsa Defeza Timor – Leste, Fatuhada, Dili, ne’ebé lori rezultadu vitória ba Ramelau kontribui ona pontu neen (6) tabela klasifikasaun provizóriu. Enkuantu ekipa Samoro hela de’it ho pontu ida (1).
Iha jogu ne’e hala’o iha ámbitu ne’ebé furak tanba anima másimu hosi adeptu klube rua nian.
Iha minutu 3 nia laran, jogadór Ramelau, Joel lansa ona golu primeiru hodi lori rezultadu ba 1-0. Hosi golu ne’e provoka liután ritmu jogu Samoro nian atu bele hatama golu ba Ramelau. Maibé, presaun hotu ne’ebé Samoro lansa la rezulta golu ruma.
Iha minutu balun nia-laran, jogadór Ramelau, José marka tan golu ida hodi lori semo rezultadu ba 2-0.
Ramelau kontinua halo presaun no jogu defensivu maibé kontrola ho másimu la fó oportunidade ba Samoro lansa suta. Nune’e iha minutu 24 Joel halo tan golu ida hodi lori score ba 3-0.
Ramelau nafatin domina bola hodi halo Samoro nia jogadór sira halai to’o hasai enerjia hotu maibé la hatudu rezultadu. Iha minutu jogadór Ramelau Elvinho lansa golu ikus ba rede Samoro hodi hatuur rezultadu ba 4-0.
Iha minutu 36 liuhosi jogadór Samoro, José Vong kontribui golu ida hodi muda score ba 4-1.
Jornalista : Hortencio Sanchez
Editór : Francisco Simões
