Pra Liga Futsal Timor-Leste, Kuda Ulun kamizola azul manan M-VDL Lahane 5-4. Imajen Tatoli/Antonio Goncalves

DILI, 19 novembru 2020 (TATOLI) – Ekipa Kuda Ulun FC susesu manan mihis M-VDL Lahane ho score 5-4.

Notísia Relevante : Pra Liga Futsal TL, hat-trick Malick lori B’Tal manan Academica 5-1

Iha jogu kontinuasaun Pra Liga Futeból salaun  (Futsal) Timor–Leste ba segunda jornada ne’ebé hala’o iha kampu Futsal Kuartél Jenerál FALINTIL-Forsa Defeza Timor – Leste, ohin kalan, Kuda Ulun halo vitória ho direitu absolutamente rekolla pontu tolu (3). Enkuantu M-VDL Lahane kontinua hela ho pontu ida (1).

jogadór Kuda Ulun halo atake ba jogadór M-VDL Lahane. Imajen Tatoli/Antonio Goncalves

Jogu ne’ebé hala’o ekipa rua hatudu forsa ba malu kuaze hanesan. Maibé, sorte primeiru monu uluk ba ekipa Lahane tanba iha minutu 7 jogadór F Fernandes fura ona rede Kuda Ulun hodi lori rezultadu ba 1-0, maibé la to’o  tan minutu ida sei jogadór Kuda Ulun, Samuel dos Reis responde kedan golu ida hodi hatuur rezultadu sai 1-1.

Hosi golu iha minutu hanesan ne’e, hasae liu tan ritmu jogu entre ekipa rua hodi halo kontra ho atake ba malu tuir ekipa ida-idak nian ne’ebé orienta hosi treinadór.

Iha minutu 8 nia laran Samuel les tan golu ida hodi hatuur rezultadu ba 2-1. Samuel hatudu duni nia vontade jogu iha kampu laran nune’e liu de’it minutu ida iha minutu 9 nia prodús tan golu ida hodi lori score ba 3-1.

Haree ba golu diferensa ona hosi M-VDL Lahane. Jogadór-sira M-VDL Lahane la nonook de’it tanba minutu sei naruk. Tanba ne’e sira halo mudansa urjente ba jogu iha minutu 18 konsege halo duni golu ba rede Kuda Ulun liuhosi jogadór Baptista hodi lori rezultadu ba 3-2. Laos ne’e de’it, iha minutu 19 jogadór Milenio lansa tan golu ida hodi lori rezultadu sai empata ba 3-3.

Kuda Ulun nia fuan la hakmatek, obrigadu tenke muda estratéjia jogu nune’e bele hamate Lahane nia jogu. Hosi mudansa ba estratéjia ne’e fó duni valor pozitivu ba Kuda Ulun tanba iha minutu 33 Samuel lansa tan golu ida hodi lori rezultadu ba 4-3.

Lahane halo kontra atake makas hodi fó ameasa ba rede Kuda Ulun, maibé la rezulta golu tanba salva maka’as hosi defeza Kuda Ulun nian. Nune’e iha minutu 35 jogadór Kuda Ulun, Ino lansa golu ikus Kuda Ulun nian ne’ebé fó vitória ba sira hodi hatuur rezultadu ba 5-3.

Kuda Ulun joga ho halimar tanba iha ona esperansa katak sira manan ona no la antesipa ho di’ak bola. Lahane uza oportunidade mamuk liuhosi jogadór F Fernandes halo tan golu kuartu hodi muda rezultadu sai fali ba 5-4. Mezmu nune’e, to’o jogu termina vitória hela ba Kuda Ulun.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here