Reitór IOB, Augusto Soares. Foto: Portal IOB

DILI, 19 novembru 2020 (TATOLI)—Estudante finalista husi Institute of Bussines (IOB) hamutuk ema na’in 139, iha kinta ne’e simu ona graduasaun baxarellatu (DIII) no lisensiatura (S1)husi Retorial IOB ne’ebé maka hala’o iha Kampus IOB Dili.

Reitór IOB Augostu da Conceição Soares, hateten serimonia graduasaun ne’e hala’o durante loron rua, loron dahuluk hala’o iha kinta (19/11) hodi fó graduasaun ba estudante hamutuk 139 no sesta aban (20/11) ba estudante hamutuk 217.

Notísia Relevante :IOB sei halo graduasaun ba finalista 300-resin

Graduadu sira ne’ebé hetan ona graduasaun ohin kompostu husi jestaun finanseira hamutuk ema na’in 69, kontabilidade 51, jestaun públika na’in 19.

No iha sesta aban sei fó graduasaun ba estudante 217 kompostu husi estudante departementu siénsia ekonomia estudu dezenvolvimento na’in 20, jestaun informátika 92, no téknika informátika na’in 105.

Augostu da Conceição Soares, informa IOB prodúz ona graduadu hamutuk 3.312 hahú husi tinan 2009 to’o agora kuaze pursentu 85 maka hetan ona servisu iha instituisaun privada no públiku.

“IOB forma ema la’ós atu buka servisu maibé atu kria servisu ba sira nia an no mós ema seluk inklui ita husu ba graduadu sira hotu atu sai ema ne’ebé kreativu no inovadór,” dehan Reitór IOB, ohin.

Nia nafatin apela ba graduadu sira atu buka aprende nafatin siénsia no téknolojia ne’ebé maka iha hodi apoiu dezenvolvimentu hahú husi família, sosiedade no nasaun.

Notísia Relevante :IOB Gradua Tan Estudante 272, Reitór: “Haka´as Aan Nafatin”

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here