Reitór Universidade Nasionál Timor Lorosa’e (UNTL), Francisco Miguel Martins. Imajen/TATOLI Egas Cristovao

DILI, 18 novembru 2020 (TATOLI)—Universidade Nasionál Timor Lorosa’e (UNTL) durante tinan 20 hahú 2000 to’o 2020 konsege prodúz ona mestradu (S3) Timoroan kuaze 200, iha área diretu, ekonomia, jestaun, saúde, polítika, administrasaun no seluk tan.

“To’o ohin loron ita konsege prodúz ona mestradu kuaze 200 iha área diretu, ekonomia jestaun, pediátria, enfermazen, parteira, rekursu naturál no ambiente, polítika jestaun, administrasaun institusionál, medisina tropikál no siénsia komunitária,” Reitór UNTL, Francisco Miguel Martins, ba Tatoli, durante serimonia dies natalis UNTL ba dala 20 iha edifísiu Fakuldade Enjinária Hera, tersa ne’e.

Notísia Relevante:Dezenvolvimentu UNTL Depende Ba Orsamentu

UNTL harii iha loron 17 fulan-novembru 2000, no iha tinan 2010 maka instituisaun ne’e foin dezenvolve an liuhusi estabelesimentu fakuldade sira no programa pos graduasaun.

“Prosesu dezenvolvimentu instituisaun UNTL la’o maka’as hahú husi 2009 mai to’o ohin loron ne’e tanba kooperasaun UNTL nian  liuhusi kolabaorasaun internasionál hodi husu formasaun liuliu iha fakuldade enjinária to’o ohin loron Japaun mak fó apoiu maka’as loos. Dezde 2001 to’o ohin loron profesór na’in 3 husi Japaun mak frekuenta ona fakuladade ne’e to’o ohin loron,” tenik tan.

Aleinde ne’e, Japaun mós fó apoiu bolsa estudu ba dosente UNTL na’in 7 iha área enjinária para hasa’e grau akadémiku mestradu no doutoramentu.

Tanba nia, dehan iha inisíu bainhira estabelese instituisaun ne’e ho de’it mestradu na’in rua maibé agora aumenta ona ba pursentu 98 no doutoramentu pursentu 40.

Dosente Timoroan ne’ebé maka halo estudu doutoramentu kuaze ema na’in 50-resin no mestradu 20-resin iha Portugal.

Kooperasaun seluk, UNTL halo ho universidade sira iha Europea, Amérika Austrália, Japaun Portugal, Nova Zelándia, Filipina no Brazil.

Ba tinan 2021, nia esplika iha programa importante ne’ebé maka sei implementa hanesan reforsa prosesu ensinu aprendizajen, ensinu pos graduasaun, investigasaun, planeamentu dezenvolvimentu dezentralizasaun no seluk tan.

Notísia Relevante:Governu Investe Osan Ba UNTL Hadi´a Kualidade Joven Sira

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here