Reitór UNTL, Francisco Miguel Martins. Foto: Mídia UNTL

DILI, (TATOLI)—Reitór Universidade Nasionál Timor Lorosa’e (UNTL), Francisco Miguel Martins deskobre katak, UNTL presiza orsamentu sufisiente hodi dezenvolve universidade ho kualidade.

“UNTL iha nia mehi no programa atu dezenvolve di’ak liu ho kualidade hanesan ho universidade sira seluk tanba ne’e ita ezije tau orsamentu sufisiente para dezenvolve,“ Reitór ne’e  esplika ba Jornalista sira iha edifísiu Ministériu Finansas, horisehik.

Bazeia ba ida ne’e Nia kontinua dehan, ba tinan 2019, UNTL propoin millions $ 17 resin, maibé iha envelope fiscal aloka ba UNTL millions $ 11 resin. Ho ida ne’e, UNTL presiza tan millions $ 5 resin para atu asegura atividade no planu asaun annual UNTL nian.

Aumentu orsamentu ne’e sei responde ba osan iha kapitál menór hodi sosa ekipamentus hanesan komputadór, data show no seluk tan hodi resolve problema falta komputadór no data show iha sala aprendizajen, ne’ebé oras ne’e at hotu.

Alende ne’e, sosa mós karreta ba UNTL hodi fasilita dezlokasaun estudante finalista ba estájiu iha munisípiu, pratika laboratóriu no seluk tan.

Hosi parte Kapitál dezenvolvimentu, universidade ne’e planu sei aumenta aula aprendizajen tanba númeru estudante kada tinan aumenta makaas. Nune’e mós presiza rekrutamentu ba dosente sira.

Jornalista: Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here