Imajen/Media PR.

GLENO, 18 novembru 2020 (TATOLI)–Prezidente Francisco Guterres Lú Olo husu ba Koordenadór Sentru Prosesamentu no Distribuidór Fini Ikan Nila iha Ermera atu bele estabelese tan fatin prosesamentu no distribuisaun fini ikan iha fatin seluk iha territóriu laran hodi responde ba nesesidade merkadu nasionál no ba dezenvolvimentu ekonómia.

“Prezidente Repúblika Lú Olo husu ba ba responsável sentru prosesamentu atu estabelese tan sentru prosesamentu ikan nila iha territóriu laran hodi responde nesesidade ekonómia,” Prezidente Repúblika Francisco Guterres Lú Olo hateten bainhira hala’o vizita iha sentru prosesamentu ikan iha Postu Administrativu Gleno, Munisípiu Ermera, kuarta ne’e.

Sentru prosesamentu no distributór fini ikan Gleno hanesan projetu parseria entre Governu Timor-Leste ho Governu Nova Zelándia, ne’ebé fó fiar ba Organizasaun World Fish hodi implementa no Superviziona hosi Ministériu Agrikultura no Peskas, hanesan na’in ba sentru ida-ne’e.

Iha vizita ne’e, Prezidente Repúblika Lú Olo akompana hosi espoza Cidália Nobre Guterres no membru VIII Governu Konstitusionál ba vizita fatin prosesamentu no distributór fini ikan, ne’ebé hahú nia produsaun ikan dezde 2017.

Iha fatin ne’e, Prezidente Francisco Guterres Lú Olo rona esplikasaun kona-ba lalaok produsaun fini ikan no vizita kolam sira ne’e iha hosi responsável Tékniku Peskas Munisípiu Ermera, Markus de Jesus Martins, esplika sentru prosesamentu no distributór fini ne’e estabelese iha 2015 no komesa halo produsaun fini ikan iha 2017 ho teknolójia foun mak monosex.

“Teknolójia monosex ne’e atu halo ikan ne’e sai aman hotu. Objetivu ita halo ikan ne’e sai aman ho orientasaun ba negósiu. Durasaun fulan 4 ka 5 ita bele halo ona koileta,” Marcos hateten.

Iha sentru produsaun fini ikan ne’e eziste kolam haat (4) ho medida 10 x 20 m, maibé kolam ida la funsiona. Kada kolam ida iha hapa (rede tolu) ho ikan-aman 150 no inan 200. Iha semana ida bele rekolla ikan tolun ho kuantidade rihun 100 ba leten.

Sentru ne’e distribui ona fini no ikan ba komunidade, sosiedade sivil no ba liña ministeriál seluk, iha munisípiu 10, menus Covalima no ba Rejiaun Autónoma Espesiál Óe-Cusse Ambeno (RAEOA) atu hetan fini ikan presiza halo proposta ba sentru produsaun fini ikan ne’ebé tuir mai sei halo verifikasaun hodi hatene kondisaun ne’ebé proponente sira prepara hanesan fatin, medida no kuantidade kolam ne’ebé sei uza atu haki’ak ikan.

Liuhosi programa Parseiru Públiku ho Privadu (PPP), sentru prosesamentu no distributór ikan ne’e mós estabelese iha Balibo, Munisipiu Bobonaro no iha Com, Munisipiu Lautém.

Diferensa sentru iha Gleno ho sentru rua seluk iha Balibo no Com mak ho PPP sira bele fa’an ba públiku, enkuantu iha ne’e (Gleno) labele tanba ida ne’e Governu-nian. 

Difikuldade ne’ebé mak sentru ne’e enfrenta maka laiha mákina atu prosesa hahán ba ikan no falta bomba supa bee hodi fornese ba kolam sira liuliu iha tempu bailoron naruk.

“Difikuldade ne’ebé ami hasoru, ami hato’o ba Na’i Prezidente, tanba iha parte Governu, ami-nia ministériu hato’o proposta ba, dala ruma ko’a tiha. Nune’e ho Prezidente nia vizita ne’e prezidente bele haree,” responsável ne’e hateten.

Notísia Relevante: Timor-Leste tenke iha kualidade edukasaun

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here