Imajen/Espesiál.

GLENO, 18 novembru 2020 (TATOLI)–Prezidente Repúblika, Francisco Guterres ‘Lú Olo’, hateten Timor-Leste tenke iha kualidade edukasaun nune’e lori nasaun ne’e la’o ba oin.

Notísia Relevante: Má-Nutrisaun kontinua aas iha Munisípiu Ermera, Bobonaro no RAEOA

PR Lú Olo hateten, atu bele tranzmite ba ema seluk no ba povu hosi rai seluk, Timor tenke iha duni kualidade edukasaun atu bele tama iha kompetisaun iha mundu ida ne’e, atu bele hatudu mós dehan katak Timor mós matenek hanesan ho nasaun sira seluk.

Imajen/Espesiál.

“Tanba ohin loron mundu ne’ebé mak sai modernu tebes no mundu ne’ebé kompete maka’as liuhosi teknolójia foun ne’ebé país sira dezenvolvidu liu ho siénsia ne’ebé mak sira hatene. Timor-Leste tenke iha kualidade edukasaun nune’e lori nasaun ne’e la’o ba oin,” Prezidente Lú Olo hateten ba jornalista sira bainhira vizita Eskola Bázika 10 Abril iha Gleno, Munisípiu Ermera, kuarta ne’e.

Tanba ne’e, Xefe Estadu ne’e hateten, profesór ho professora tenke kontinua iha formasaun ne’ebé la’o nafatin iha polítika Governu nian atu akompana nafatin oan sira to’o iha nível universitáriu. 

PR Lú Olo haktuir, Timor-Leste rai ida kiik maibé ho oan-feto no oan-mane barak tebes no Timor atu ba oin so oan ho be’oan sira mak bele kaer tutan.

“Valór hosi beiala sira nia dezde luta ba ukun rasik-aan nia to’o mai ita ukun rasik-aan nian so oan ho be’oan sira mak bele kaer. Atu kaer valór sira ne’e hotu, oan ho be’oan sira tenke matenek para haree hosi nia aldeia no haree mós ba aldeia sira seluk no haree hosi Ermera ba too iha Suai, Oe-Cusse liuhosi Ataúro ba to’o fali iha Jaco Tutuala,” nia dehan.

Ho vizita ne’e Prezidente Repúblika hakarak husik hela mensajén no kuda ai-oan ba alunu no profesór no profesora sira iha Eskola Ensinu Báziku 10 de Abril Gleno.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here