Projetu PFMO-Komponente 2 “OSAN POVU NIAN, JERE HO DI’AK”, ohin, iha Dili, halo enserramentu no entrega sertifikadu ba investigadór hosi Polísia Sientífika no Investigasaun Kriminál (PCIC) no investigadór Komisaun Anti-Korrupsaun (CAC) hamutuk na’in 71 ne’ebé termina ona sira nia formasaun kona-ba “Prevensaun no Investigasaun Kriminál’’. Imajen Tatoli/Nelson de Sousa

DILI, 18 novembru 2020 (TATOLI)-Projetu PFMO-Komponente 2 “OSAN POVU NIAN, JERE HO DI’AK”, ohin, iha Dili, halo enserramentu no entrega sertifikadu ba investigadór  hosi  Polísia Sientífika no Investigasaun Kriminál (PCIC) ho investigadór Komisaun Anti-Korrupsaun (CAC) hamutuk na’in 71 ne’ebé termina ona sira nia formasaun   kona-ba “Prevensaun no Investigasaun Kriminál’’.

Notísia Relevante : Funsionáriu CAC ho PCIC tuir formasaun prevensaun no investigasaun kriminál

Serimónia   entrega sertifikadu nne’ebé hla’o iha salaun konferénsia Timor Plaza ne’e partisipa hosi Embaixadór Portugal iha Timor-Leste, José Pedro Machado Vieira, Embaixadór Uniaun Europeia mai Timor-Leste, Andrew Jacobs, Diretór Nasionál PCIC, Vicente Fernandes e Brito, Komisáriu CAC, Sérgio Hornai no mós Koordenadór Jerál projetu PFMO, Rui Dinis.

Formandu-sira ne’e tuir ona formasaun hahú hosi loron 9 to’o 18  novembru, tinan ne’e, ho nia divide iha módulu tolu ho tema sira tuir hanesan, “Metodolojia Investigasaun Kriminál”, “Étika no Deontolojia Polisiál/Sijilu Profisionál” no “Prevensaun Kriminál no Medida Kautelar no hosi Polísia”, mak inseridu iha “Área Krime Ekonómiku no Finanseiru”.

Projetu PFMO-komponente 2 iha ko-finansiamentu hosi Uniaun Europeia (UE) no ko-finansiamentu no jestaun hosi Camões, I.P. Setór prinsipál ba projetu ne’e hatama ba boa governasaun no objetivu hosi intervensaun ida-ne’e mak atu kontribui ba dezenvolvimentu sustentável Timor-Leste nian, liuhosi jestaun no supervizaun ba Finansas Públikas, ne’ebé transparente liu no orientada ba sidadaun.

Iha diskursu, Diretór PCIC, Vicente Fernandes e Brito, hateten,  formasaun ne’e  importante tebes  liuhosi parseiru  PFMO  ho objetivu oinsá  aumenta kompeténsia investigadór PCIC no espesialista Anti-Korrupsaun.

“Formasaun durante semana tolu,  formadu-sira hetan teoria hodi rekorda investigasaun, oinsá utiliza métodu rekolla jestaun prova ba pesoa prátika krime,” nia hateten.

Komisáriu CAC, Sergio Hornai, agradese ba esforsu  Uniaun Europeia liuhosi parseira ho  PFMO  hodi implementa projetu refere   ho inisiativa atu hasa’e kualidade servisu públiku iha Timor-Leste liuhosi kapasitasaun  hodi halo kontrolu garante ba efikásia jestaun no supervizaun finansas públika.

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here