Xefe Suku Caicoli, Hipólito Marques. Imajen TATOLI/Osória Marques.

DILI, 17 novembru 2020 (TATOLI)—Xefe Suku Caicoli seidauk simu orientasaun hosi Governu liuhosi Ministériu Solidaridade Sosiál no Inkluzaun (MSSI) kona-ba pagamentu faze daruak ba lista reklamante sira.

“To’o agora ami hosi suku Caicoli rasik lahatene buat ida kona-ba subsídiu $200 ba agregadu família ba faze daruak reklamante nian, tanba ne’e ami labele taka sai naran reklamante nian iha sede suku,” Xefe Suku Caicoli, Hipólito Marques, ba Agência TATOLI iha nia knaar fatin sede suku Caicoli, Postu Administrativu Na’in Feto, Munisípiu Dili, tersa ne’e.

Notisia Relevante: Semana ne’e, MSSI halo pagamentu ba reklamante 2.881

Xefe suku ne’e haktuir, sira simu orientasaun iha fulan outubru ne’e dehan MSSI atu halo ona pagamentu maibé depois sira rasik mak kansela tanba mosu failansu iha MSSI nian.

Atu selu reklamante sira-ne’e, nia dehan, la susar tanba osan restante ne’e sei iha konta bankaria suku nian maibé tanbasá mak demora no durasaun ne’ebé mak kleur liu.

“Ita entrega hotu ona lista reklamante ba Ministériu Administrasaun Estatál (MAE) no MSSI ona. Ami preokupa tanbasá mak kleur,” nia hateten.

Tuir nia, osan COVID-19 ne’ebé hodi selu ba benefisiáriu sira-ne’e sei iha banku maibé parte relevante la aselera mak osan ne’e sei labele fahe ona tanba utilizasaun osan COVID-19 ne’e to’o iha dezembru tinan ne’e.

“Se sira lakohi aselera lalais prosesu pagamentu ba benefisiáriu sira mak osan ne’e sei taka tanba osan ne’e maihosi COVID-19 nian, nune’e dezembru ita sei labele kontinua pagamentu karik tanba ita agora fulan novembru ona,” xefe suku ne’e hateten. 

Nia informa, iha Suku Caicoli ne’e reklamante hamutuk 47 de’it no daudaun ne’e sira-nia osan restante iha konta bankaria suku nian hamutuk  rihun $12 ne’ebé mak sei bele selu ba xefe famílai 47 ne’e. Nia dehan, dalaruma sei iha tan restu tanba selu ba reklamante sira-ne’e selu de’it rihun $9.400 no sei iha restu rihun $2.600. 

Hipólito Marques hateten, reklamante 47 hosi suku Caicoli ne’e ho tipu ne’ebe mak la hanesan, balun hela permanente maibé tan COVID-19 ba tiha fatin seluk no balun hela temporariamente.

“Ita hatama de’it naran ba MAE no MSSI atu aban bainrua mak sira na’in ba hatán karik entre sira balun ne’e iha saláriu boot ka simu dobru. Ita-nia dever mak hatama maibé kompeténsia no desizaun ne’e iha Governu nia liman,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here