Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques

DILI, 16 novembru 2020 (TATOLI)–Kuarta semana ne’e, Ministériu Solidariedade Sosiál no Inkluzaun (MSSI) sei halo pagamentu ba lista reklamante sira hamutuk 2.881 iha munisípiu 12 inklui Rejiaun Administrativa Espesiál Oé-Cusse Ambeno (RAEOA).

Diretór Jerál MSSI, Rui Manuel Gago Exposto hateten hein de’it Ministériu Finansa (MF) transfere osan ba konta bankária suku nian mak kuarta semana ne’e (18/11/2020) hahú halo pagamentu.

“Kuarta semana ne’e, ita bele halo ona pagamentu ba reklamante sira-ne’e. Hein katak MF bele transfere ona osan ba konta bankária suku nian nune’e reklamante 2.881 bele simu ona sira-nia direitu,” Diretór Jerál MSSI ba jornalista Agência TATOLI iha nia knaar fatin, MSSI Caicoli, Dili, segunda ne’e.

Rui Gago hatutan, tuir loloos, ohin ne’e, halo ona pagamentu ba reklamante sira, maibé iha sesta semana kotuk akontese fallansu entaun MF seidauk bele transfere osan ba konta bankária suku refere.

“Loloos ne’e, ita halo pagamentu ba lista reklamante hamutuk 2.909 maibé ami esklui fali uma-kain 28, hela 2.881, tanba identifikadu naran balun doubru. Iha mós mudansa ba orsamentu, entaun ita tenke halo fali proposta foun ba MF hodi rezolve ida-ne’e,” nia dehan.

Nia haktuir, lokraik ne’e, ekipa ne’ebé halo atendimentu iha RAEOA aranka ona tanba aban sira foin to’o iha Oé-Cusse, depois sira sei halo preparasaun no sira sei fasilita tan formasaun ba ekipa tékniku sira iha Oé-Cusse no kuarta bele ona halo pagamentu ba reklamante sira.

Kona-ba ekipa pagamentu, Rui informa, ekipa MSSI iha minisípiu mak sei halo pagamentu no durasaun halo pagamentu ba benefisiáriu sira-ne’e tarde liu mak loron tolu tanba Dili mak uma-kain barak liu no munisípiu seluk ne’e ladún barak.

Nia haklaken katak atu halo pagamentu ba reklamante sira, sei uza osan restu ne’ebé mak depózita hela iha Banco Nacional Comérsio de Timor-Leste (BNCTL) purvolta rihun $3.7.

Jornalista: Osória Marques

Editór: Xisto Freitas