UN Woman asina akordu ho UNE-TL. Imajen TATOLI/Osória Marques.

DILI, 17 novembru 2020 (TATOLI)–UN Woman liuhosi programa Inisiativa Spotlight UE-ONU, ohin,  asina akordu  ho Uniaun Nasionál Eskutéiru Timor-Leste (UNE TL)  atu hapara no esforsu elimina forma violénsia hotu-hotu hasoru feto no labarik feto sira.

Notísia Relevante: UNE-TL bele muda ema-nia hanoin kona-ba violénsia kontra feto

Embaixadór UE, Andrew Jacobs hateten hosi akordu ne’e aproveita hodi hakbesik-aan ba UNE-TL hodi fó treinamentu advokásia ba eliminasaun violénsia hasoru feto no labarik feto sira to’o iha eskutériu nasionál, haforsa inkluzaun husi ema ho defisiensia no marjinalizadu sira, no adopta kurikulu ko-edukasionál ba lian kontra violénsia atu promove programa igualdade jéneru eskutériu nian hotu hosi nível nasionál to’o iha nível munisipál no ba iha áreia rurál.

Nia hateten, projeitu ne’e sei implementa no sei kolabora ho Minisériu Edukasaun, Juventude no Desportu (MEJD), no Ministériu Administrasaun Estatál (MAE) ho atividade sira iha eskola no suku tarjetu sira iha munisípiu tolu.

UN Woman asina akordu ho UNE-TL. Imajen TATOLI/Osória Marques.

“Onra ida mai ha’u atu partisipa iha seremónia ne’e ho prezensa hosi ema hirak ne’ebé forsa no inspirativu tebes, kualidade boot hosi movimentu eskutériu sei ajuda eskutériu feto no mane sira atu influénsia ema no ajuda halo mudansa tuir dalan ne’ebé sira hanoin kona-ba violénsia hasoru feto no labarik feto sira,” Embaixadór UE, Andrew Jacobs ba jornalista sira iha Kofi Anan Meeting Hall, UN House, Caicoli, Dili, tersa ne’e.

Embaixadór ne’e haktuir, ho ida-ne’e atu halo mudansa ba moris ida ne’ebé di’ak liutan fó espasu ba feto no labarik feto sira atu moris livre husi ameasa violénsia. Tanba eskutériu sei sai ajénsia ba mudansa importante.

Entretantu, Koordenadór ONU, Roy Trivedy hateten liuhosi akordu tinan ida tutela iha inisiativa spotlight EU-ONU, UN Women no UNE-TL sei treina feto no mane eskutériu sira hamutuk 330 atu sai ajente ba mudansa ba prevensaun violénsia iha suku sira iha Viqueque, Ermera no Bobonaro.

Ida-ne’e, nia dehan, atu inkorpora mekanizmu sira atu halo atividade no papél sira ne’ebé mak iha entre rede sira ne’ebé asésivel ba grupu marjinalizadu no ema ho defisiénsia sira atu hasa’e liután sira-nia kapasidade ba prevensaun violénsia no asesu ba servisu sira.

Nia dehan, atu implementa programa estrakurikular lian hasoru violénsia to’o ba foinsa’e sira no suporta individu nia mudansa ba atitude relasiona ho norma sira ne’ebé ekilíbriu ba eru entre adolesente sira.

“Uniaun Europeia no Nasaun Unida kometidu atu tau foinsa’e sira iha sentru ba prevensaun violénsia hasoru feto no labarik feto sira. Ami fiar katak estratéjia prevensaun efetivu tenke enkaixa foinsa’e sira hodi sai hanesan lider no partisipante. Entaun atu prevene violénsia hasoru feto no labarik feto sira tenke komesa sedu iha ema nia moris liuhosi eduka no sevisu hamutuk ho labarik mane no feto sira,” Roy Trivedy hateten.

Iha asinatura M’oU ne’e sei oferese $70.000 ba UNE-TL atu implementa kurikulu violénsia hasoru feto iha munisipiu tolu foka ba iha novembru 2020-novembru 2021 no suporta promosaun igualdade jéneru iha nia programa hotu hodi haburas liután inkluzaun iha eskutériu.

Parseria ne’e hanesan parte hosi Inisiativa Spotlight UE-ONU nia esforsu hodi dedika ba transformasaun norma sosiál ne’ebé suporta autór sosiedade sívil sira ba promove igualdade jéneru iha Timor-Leste. Investimentu tinan tolu hosi programa suporta hosi UE iha Timor-Leste ho montante millaun $15 ho nia objetivu atu haforsa enkuadramentu legál no instituisaun sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here