Prezidente Timor GAP,E.P, António José Loiola de Sousa. Imajen TATOLI/Egas Cristóvão

DILI, 17 novembru 2020 (TATOLI)—Prezidente Timor GAP, E,P, António José Loiola de Sousa, hateten konsekuénsia hosi asina delimitasaun Fronteira Marítima (FM) halo Austrália mós sai na’in ba Greater Sunrise (GSR).

Notísia Relevante: Timor Gap prioritiza “upstream” no “downstream” iha 2021

“Ita tenke haree didi’ak rejime Greater Sunrise rasik tanba konsekuénsia hosi tratadu fronteira marítima dehan Greater Sunrise ne’e la’ós Timor-Leste nian mesak tanba ita tenke konsensu ho Austrália hodi ita deside hamutuk, maske ita haree mapeamentu ne’e barak liu mai Timor-Leste nian entaun na’in ba rekursu Greater Sunrise ne’e Austrália no Timor-Leste,” Prezidente Timor Gap, António de Sousa, esplika liuhosi audiénsia públika ho Komisaun C (Finansa Públika) no Komisaun D (Ekonomia no Dezenvolvimentu), iha plenária Parlamentu Nasionál, tersa ne’e.

Prezidente Timor Gap ko’alia asuntu ne’e tanba Deputada Bankada CNRT, Virgínia Ana Belo konsidera VIII Governu laiha seriedade atu kontinua dezenvolve Greater Sunrise.

António de Sousa hatutan, akordu delimitasaun fronteira marítima ne’ebé asina iha loron 6 marsu 2018 iha sede Organizasaun Nasaun Unida (ONU) nian previstu klaru iha aneksu B (Rejime espesiál Greater Sunrise nian).

“Entaun, konsekuénsia hosi tratadu fronteira marítima anexu B ne’ebé hatuur momoos iha-ne’ebá kona-ba kondisaun ekivalente sira,” Prezidente Timor Gap fundamenta.

Bazeia akordu ne’e previstu iha Anexu B alínea 1, hateten objetivu hosi Rejime Espesiál Greater Sunrise nian mak dezenvolvimentu, esplorasaun no jestaun konjuntu sira hosi petróleu iha kampu sira Greater Sunrise nian, ba benefísiu ba parte sira hanesan (Timor-Leste no Austrália).

Purtantu, artigu 2 hosi Anexu B (Propriedade kona-ba petróleu no partilla reseita sira-nian, alínea 1 hateten, petróleu hotu ne’ebe produzidu iha kampu sira Greater Sunrise ne’e propriedade Timor-Leste no Austrália nian.

Alínea 2 hatutan, parte sira tenke partilla reseita sira hosi upstream, ka reseita sira diretamente rezultante hosi esplorasaun upstream petróleu produzidu nian iha kampu sira Greater Sunrise.

Hosi alínea 2 (a) dehan iha proporsaun porsentu 70 ba Timor-Leste no porsentu 30 ba Austrália, se hosi kampu sira Greater Sunrise sei dezenvolvidu liuhosi gazodutu ida ba Timor-Leste, ka:

Nune’e mós alínea 2 (b) hatutan, iha proporsaun porsentu 80 ba Timor-Leste no porsentu 20 ba Austrália, se hosi kampu sira Greater Sunrise sei dezenvolvidu liuhosi gazodutu ida ba Austrália.

Asinatura ba delimitasaun fronteira maríritima iha loron 6 marsu 2018 ne’e parte Timor-Leste reprezenta hosi Ministru Estadu Prezidénsia Konsellu Ministru, Agio Pereira no parte Austrália nian reprezenta hosi Ministra Negósiu Estranjeiru, Julie Bishop, ne’ebé sasin hosi Sekretáriu Jerál ONU, António Guterres no Prezidente Komisaun Konsiliasaun, Embaixadór Peter Taksøe-Jensen.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here