Prokuradór Jerál Repúblika, José Ximenes. Imajen Tatoli /Egas Cristovão

DILI, 16  novembru 2020 (TATOLI)-Prezidente Repúblika (PR), Francisco Guterres “Lú-Olo’’, enkoraja Ministériu Públiku (MP) atu kontinua esforsu no ultrapasa hodi luta kontra krime organizadu sira ne’ebé akontese iha Timor-Leste hodi fó efeitu negativu ba sosiedade.

Notísia Relevante : OJE 2021, PGR propoin $4,787,430

“Exelénsia Prezidente Repúblika nia mensajen hateten, Ministériu Públiku favor tenke iha korajen enfrenta kriminalidade organizada,” Prokuradór Jerál Repúblika (PGR), José Ximenes, hateten ba jornalista, ohin, hafoin enkontru ho Xefe Estadu iha Palásiu  Prezidensiál, Dili.

José Ximenes, agradese ba sapoiu  hosi Xefe Estadu nian kontinua halo esforsu ida ne’e. Nune’e, PGR mós estabelese ona gabinete kombate korrupsaun no krime organizadu atu luta kontra krime organizadu sira hanesan droga, brankamentu kapitál, korrupsaun no tráfiku umanu.

“Atu luta kontra krime organizadu presiza parte hotu hanesan mídia hahú halo divulgasaun informasaun maka’as,” PGR José Ximenes hateten.

Tuir ajenda iha loron 19 novembru, tinan ne’e, PGR sei halo distribuisaun ba objetu krime matéria droga   kilograma tolu (3) ka ekivalénsia ho grama 253 ne’ebé autoridade sira halo apreensaun.

Iha enkontru  ne’e PGR José Ximenes informa  mós ba PR Lú-Olo kona-ba atividade prosesuál Ministériu Públiku  ne’ebé hahú iha 01 janeiru to’o 31 outubru 2020 iha nivel nasionál .

“Halo balansu uitoan atividade  MP  nian durante fulan-10 iha nivel nasionál iha  entrada prosesu krime 5,600-resin  mak tama no ita ultrapasa kapasidade resposta termina buat hotu  estavel agora besik ka hela prosesu  3,000   mak pendente,” José Ximenes hateten.

Nia  esklarese katak razaun primeiru prosesu pendente tanba prosesu sira tama mai iha  MP la movimenta no ninia investigasaun seidauk finaliza. Maibé MP nu’udar na’in ba asaun penál  kontinua halo esforsu hodi halo intervensaun sira ho di’ak liután.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here