Sekretária Estadu ba Igualdade no Inkluzaun, Maria José da Fonseca Monteiro de Jesus. Imajen Tatoli/Egas Cristovão

DILI, 16 novembru 2020 (TATOLI)–Iha proposta orsamentu jerál Estadu (OJE) 2021, Sekretaria Estadu Igualdade no Inkluzaun (SEII) propoin orsamentu hamutuk millaun $2,540 atu empodera ekonomia feto.

“OJE tinan oin ninian ita propoin millaun $2,540 hodi fó importánsia ba empoderamentu ka hakbiit ekonomia feto, hasa’e partisipasaun feto iha vida polítika no mós aborda integradu jéneru,” Sekretária Estadu Igualdade no Inkluzaun, Maria José da Fonseca Monteiro de Jesus ba Agência TATOLI bainhira aprezenta sira-nia programa no orsamentu 2021 nian iha Komisaun F trata asuntu Saúde, Seguransa Sosiál no Igualdade Jéneru, iha resintu Parlamentu Nasionál, segunda ne’e.

Notísia relevante: SEII sei apoia grupu feto iha munisípiu 12 no RAEOA

Governante ne’e hatutan, sira sei atribui orsamentu millaun $5 ba kada suku no suku 150 mak SEII haree hela atu kobre oinsá mak bele hakbiit ekonomia feto.

Aleinde ne’e, Maria informa, tinan oin SEII sei rekruta tan funsionáriu kazuál sira hodi kompleta ba iha departamentu finansa no aprovizionamentu.

“Ita sei rekruta tan funsionáriu kazuál sira hodi apoiu serbisu iha postu administrativu 52 no ita mós iha pontu vokál 13. Tanba ida ne’e mak ita hakarak atu haree oinsá mak sira na’in-13 ne’e bele tau-matan hela ba postu 52,’’ nia tenik.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here