Governu ho Parlamentu Nasional Votasaun Proposta OJE 2020 iha debate faze Espesialidade, iha sala plenáriu PN, segunda (05/10). Imajen Tatoli/Egas Cristovão

DILI, 05 outubru 2020 (TATOLI)—Sekretária Estadu Igualdade no Inkluzaun (SEII), Maria José da Fonseca Monteiro de Jesus, sei apoia grupu feto sira iha munisípiu 12 no Rejiaun Administrativa Espesiál Oé-Cusse (RAEOA) liuhosi osan tranferénsia públika.

Orsamentu 2020 ba Sekretaria Estadu Igualdade no Inkluzaun (SEII) hamutuk $959,910 komposta hosi saláriu no vensimentu $429,757, bens no servisu $482,153 no transferénsia públika $48,000.

Sekretária Estadu ne’e fó-sai katak, programa feto no mane liuhosi apoiu ba empoderamentu feto, igualdade iha oportunidade família mais karensiada (subsídiu kondisionál “Bolsa da Mãe”).

Maria José da Fonseca Monteiro de Jesus, fó-sai katak hosi montante orsamentu ezekuta ona rihun $500-resin hahú hosi janeiru to’o setembru, hela de’it $400-resin ba fulan outubru, novembru no dezembru.

Ohin, Parlamentu Nasionál aprova orsamentu SEII nian ho rezultadu votasaun a-favór 43 kontra 0 no abstensaun 19

Medidia prinsipál hosi SEII nian ba 2020 mak sei halo abordajen integrada jéneru iha polítika, lei sira, programa, planu no orsamentu públiku iha komunidade.

Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten ezekusaun iha portál ho baze ba orsamentu 2019 nian, enkuantu ba 2020 ne’ebé kategoria transferénsia públika ne’ebé la konsege ezekuta tanba durante époka ka rejime duodesimál la fó dalan.

“Ami labele ezekuta tanba DOT la fó dalan ami atu ezekuta tanba ne’e mak tenke hein Orsamentu Jerál Estadu wainhira aprovadu no promulgadu mak ami foin bele ezekuta. Atu informa iha uma fukun katak SEII tinan ida-ne’e fasilita tiha ona grupu benefisiáriu sira hotu hosi tranferénsia públika iha munisípiu sira hotu no mós RAEOA la’o hela,” dehan Sekretária Estadu Igualdade no Inkluzaun (SEII), Maria José da Fonseca Monteiro de Jesus, liuhosi plenária Parlamentu Nasionál iha ámbitu espesialidade loron dahuluk, segunda ne’e.

Sekretária Estadu promtete sei ezekuta hotu  $48,000 liuhosi tranferénsia públika hodi benefísia grupu benefisiáriu sira.

Nia hateten, montante ida-ne’e sei hala’o advokása, hasa’e partisipasaun feto nian iha nível polítika iha ámbitu foti desizaun sira no medida prinsipál importante sira-ne’ebé temi iha livru planu asaun anuál.

Nune’e mós redús  dezigualdade entre feto no mane iha ámbitu asesu ba rekursu no opurtunidade espesialmente asesu ba podér, kontrolu rekursu sira, alkansa desizaun iha vida sosiu-ekonómika, polítika no asesu ba justisa no seguransa.

Medida prinsipál setoriál SEII nian ba tinan 2020 kontinua promove no halo abordajen integrada jéneru iha polítika, lei sira, programa sira, planu sira no orsamentu públiku no komunidade.

SEII sei mellora no reforsa sistema formál justisa nian hodi pevene violénsia, kria mudansa atitude no mentalidade relasaun ho  prevensaun Violénsia Bazeia ba Jenéru (VBG-sigla portugés) iha komunidade.

SEII sei asegura partisipasaun feto sira iha nível nasionál, munisipál no suku sira iha dezenvolvimentu ekonómiku, iha vida polítika iha nível sira foti desizaun sira no ikus liu mak promove governasaun di’ak, jestaun institusionál no fortalese kapasidade rekursu umanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here