Ministru Edukasaun Juventude no Desportu, Armindo Maia.Imajen/Antonio Goncalves

DILI, 13 novembru 2020 (TATOLI)—Governu liuhusi Ministériu Edukasaun Juventude no Desportu (MEJD) tuir orariu sei halo abertura ba ezame nasionál iha eskola Ensinu Sekundáriu Jerál Sagradu Kurasaun de Jesus Becora Dili no Ensinu Sekundária Jerál Nino Konis Santana Gleno Munisípiu Ermera.

Ministru Edukasaun Armindo Maia ho Vise Ministru António Guterres maka ofisialmente sei halo abertura ba eskola rua ne’e iha segunda (16/11).

Notísia Relevante:MEJD hahú distribui materia ezame nasionál

“Segunda dader tuku 08:00 ha’u sei halo abertura iha eskola ensinu sekundária Jerál Sagradu Kurasaun de Jesus Becora,  no ha’u nia vise sei ba eskola Ensino Sekundária Jerál Nino Konis Santana Gleno Ermera,” nia inform aba jornalista sira iha Salaun konferénsia MEJD Villa-Verde Dili.

Governante ne’e fiar katak distribuisaun pontu ezame nasionál ne’ebé hala’o ona iha sesta ohin sei tulun Servisu Edukasaun Munisípiu idaidak atu distribui liután materia ezame ba eskola sira iha baze hodi prepara ba ezame nasionál ho di’ak.

Ministru Edukasaun Juventude no Desportu, Armindo Maia, informa totál estudante finalista hamutuk 55.072, kompostu husi ensinu báziku 30.359, ensinu sekundária jerál 20.145, kompostu husi siénsia teknolojia 10.365, siénsia sosiál no umanidade 9.780.

Enkuantu, estudante finalista husi ensinu sekundária tékniku vokasionál hamutuk 4.568, kompostu husi área tékniku 1.462, ekonomia komérsiu 1.501, otelária  komérsiu 568, agrikultura no peska hamutuk 1.037.

Nia dehan estudante finalista 55.072 rejista maihusi eskola 444, eskola ensinu báziku 292, ensinu sekundária Jerál 96 no ensinu sekundáriu tékniku vokasionál 56.

Notísia Relevante:MEJD kontrata Sylvia imprime matéria ezame nasionál

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here