Prezidente Repúblika, Francisco Guterres 'Lú-Olo'. Imajen Tatoli/Antonio Goncalves

DILI, 10 novembru 2020 (TATOLI)–Prezidente Repúblika, Francisco Guterres ‘Lú-oló’, hateten nasaun Timor-Leste nia forsa boot mak juventude.

Lú-oló hatutan, semitériu Santa Cruz marka istória foun tanba Juventude Lorico Assua’in hatudu ba mundu tomak katak rezisténsia servisu ho koordenasaun iha frente hotu-hotu no juventude mak hatutan espiritu funu nian no afirma perante imigu no perante mundu tomak.

“Ita-nia determinasaun imi (joven) sira mak sei hatutan nafatin valór sira-ne’e no dezáfiu ne’ebé boot liu ba imi, foin sa’e sira, mak hatene nakfilak  valór sira-ne’e ba ferramenta útil ida hodi hasoru dezáfiu sira ohin loron nian hodi ita-nia nasaun nia forsa boot mak juventude,”  Prezidente Repúblika, Francisco Guterres ‘Lú-oló’, hato’o mensajén ba selebrasaun 12 novembru ba dala XXIX ne’ebé lee huoi Reinaldo Kilik Junior iha semináriu ho tema “Tranzmite Espiritu 12 Novembru Joven Sira-Nian iha Faze Libertasaun” ne’ebé mak organiza hosi Organizasaun Rezisténsia Sagrada Família, iha salaun Xanana Sport Center, Dili, tersa ne’e. 

Tanba ne’e, purvolta 75% hosi populasaun iha oportunidade ida-ne’e, Prezidente Repúblika apela ba juventude sira hotu atu servisu hamutuk hodi kria espasu hodi esplora sira-nia poténsia sira, espresa sira-nia talentu no kontinua  iha área oioin atu dezenvolve rai ida-ne’e.

“Ha’u hein katak iha semináriu ida-ne’e, ne’ebé organiza hosi Organizasaun Sagrada Familia, imi bele analiza, diskute no debate forma no ideia oioin hodi buka hatutan ba jerasaun foun espiritu loloos 12 novembru nian hodi forma sidadaun sira-ne’ebé  ativu, krítiku no responsável iha kontestu dezenvolvimentu,” prezidente hateten.

Nia hateten, Estadu tomak liuliu Governu iha obrigasaun atu halo identifikasaun ba fatin potensiál juventude sira-nian no juventude nia kapasidade iha área oioin, Governu tenke fasilita joven sira ba involve ativamente Timor-Leste nia prosesu dezenvolvimentu.

“Maibé, Governu mesak de’it la to’o.  Governu hala’o ninia parte no imi, joven sira mós tenke hala’o imi-nia parte.  Governu nia esforsu ho imi jove sira-nia inisiativa no servisu presiza hasoru malu iha pontu ida no kompleta malu mak hamutuk ita bele hakat ba oin hodi atinji ita-nia objetivu nasionál dezenvolvimentu,” nia dehan. 

Iha tinan 29 liubá, nia dehan, foinsa’e sira see sira-nia hirus-matan ba bala no ajuda loke mundu nia matan kona-ba timoroan sira-nia luta ukun rasik-aan. 

Ohin Loron, Prezidente da Repúblika fiar katak foinsa’e sira forsa kreativa ne’ebé bele hamosu kreatividade oioin atu solusiona problema no preokupasaun sira ba nasaun no povu ida-ne’e.

“Tanba ne’e mak ita selebra loron nasionál ba juventude iha loron 12 novembru ba tinan ne’e ba dala XXIX, juventude Lorico Asua’in 200-resin lakon sira-nia vida, ne’ebé akontese iha Semitériu Santa Cruz bainhira ho espiritu nasionalista no domin ba ita-nia povu no ba ita-nia nasaun, see-aan ba mate hodi defende ita-nia indepéndensia,” nia hatete.

Xefe Estadu ne’e hateten, iha momentu 12 novembru 1991 ne’ebá, juventude Lorico Assua’in hatudu ba mundu tomak liuliu ba povu Timor-Leste tomak katak hamriik organizadu no determinadu hodi ukun rasik-aan.

Notísia Relevante: Joven tenke sai solusaun ba problema

Jornalista : Osória Marques

Editór : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here