iklan

NASIONÁL, HEADLINE

Joven tenke sai solusaun ba problema

Joven tenke sai solusaun ba problema

Imajen/Media PR.

DILI, 10 novembru 2020 (TATOLI)—Prezidente Repúblika, Francisco Guterres “Lú Olo”, hateten joven tenke sai solusaun ba problema.

Iha audiénsia entre Sekretariu Estadu ba Juventude no Desportu, Abrão “Nokosiku” Saldanha, ne’e Prezidente Repúblika hateten tema ne’ebé hili ba Loron Nasionál Juventude “Joven Kontribui ba Sosiedade ida Rezilente” pertinente tebe-tebes iha kontestu Timor-Leste ohin loron ninian, tanba ne’e joven tenke sai solusaun ba problema.

Importante tebetebes atu halo preparativus ba rezilénsia joven nian atu hasoru problema oioin ne’ebé nasaun enfrenta.

Sekretáriu Estadu Juventude no Desportu informa, iha tempu luta ba ukun rasik-aan joven sira hasoru ameasa okupasaun Indonézia ninian maibé iha kontestu agora joven tenke sai rezilente atu hasoru dezafiu oioin hanesan ameasa COVID-19, mudansa klimátika no revolusaun teknolójia komunikasaun no informasaun, tanba ne’e presiza harii rezilénsia atu hasoru dezafiu ekonómiku, sosial no kulturál.

Papél estadu mak promove no kria espasu ba joven sira atu enkuadra sira-nia aan iha prosesu dezenvolvimentu nasionál.

Prezidente Repúblika apresia tebes inisiativa juventude sira-nian ba komemorasaun Loron Nasionál Juventude no konfirma atu partisipa no sei hato’o diskursu.

Sekretáriu Estadu Juventude Desportu hato’o preparativu ba komemorasaun nian ne’ebé joven sira organiza iha Díli no munisípiu sira liuhusi atividade oioin hahú kedas ho reflesaun iha 27/28 outubru nu’udar loron mate saudozu Sebastião Gomes, konsulta médika massal ba sobrevivente 12 novembru no nia família, reflesaun iha 11 novembru, sertame, kompetisaun hakerek, kompetisaun drum band, semináriu no konsertu múzika.

Sekretáriu Estadu ba Juventude no Desportu informa ba Prezidente Repúblika katak demografikamente joven ho idade 35 mak kraik konstitui 75 % nu’udar poténsia boot ba dezenvolvimentu nasionál.

Joven sira hatudu tiha ona katak hafoin reseita fundu minarai ninian, reseita prinsipál ba Timor-Leste mak mai husi poténsia joven sira-nia ne’ebé serbisu iha tasibalun liuhusi remesso ka remittances. Tanba ne’e jovens tenke sai autór ba kriasaun. Governu fó apoiu finanseiru ba komemorasaun iha Díli no munisípiu sira bazea ba kreatividade joven sira-nian.

“Orsamentu mezmu ki’ik maibé Governu rekoñese kapasidade joven sira-nian no joven sira mak foti inisiativa organiza no sira organiza liu saida mak Governu hanoin,” Abrão Saldanha hateten.

Komunikadu Imprensa

 

iklan
iklan

Leave a Reply

iklan
error: Content is protected !!