Reprezentante UNICEF iha Timor-Leste, Valérie Taton, hamutuk ho ekipa hasoru malu ho Primeiru-Ministru, Taur Matan Ruak, iha Palaçio do Governo, segunda (10/11). Imajen/Mídia GPM

DILI, 09 novembru 2020 (TATOLI)–Reprezentante Fundu Nasaun Unida ba Labarik (UNICEF, sigla inglés) iha Timor-Leste, Valérie Taton, hato’o apresiasaun ba Governu tanba konsege atinje progresu barak iha parseria durante ne’e.

“Objetivu prinsipál hala’o enkontru ho Primeiru-Ministru hanesan despedida, no mós hanesan apresiasaun ba kolaborasaun entre Governu Timor-Leste ho UNICEF ne’ebé maka durante ne’e la’o durante tinan-tolu,” Valérie Taton ko’alia asuntu ne’e hafoin halo vizita kortezia ho Xefe Governu, iha Palásiu Governu, segunda ne’e.

Durante mandatu, UNICEF serbisu hamutuk ho Ministériu Edukasaun (ME), Ministériu Saúde (MS), Ministériu Solidariedade Sosiál no Inkluzaun (MSSI), Ministériu Justisa (MJ), Ministériu Obra Públika (MOP) hodi haree ba lejizlasaun sira ne’ebé ko’alia kona-ba labarik. 

“Durante ami-nia mandatu tinan tolu, ami haree liu ba área saúde, edukasaun, no mál nutrisaun. Hosi ne’e, progrsesu di’ak tebes maka mál nutrisaun iha Timor-Leste,” nia rekoñese.

Notísia Relevante: Halo despedida, reprezentante UNICEF konsidera Timor-Leste di’ak ba kooperasaun

Reprezentante ne’e iha iha esperansa bele rezolve buat ne’ebé seidauk atinje.

“Durante halo parseria ho Governu, ita haree katak progresu barak mak atinje ona, maibé durante ne’e ita sei iha dezafíu barak mak ita hasoru hela, tanba ne’e espera bele kontinua iha futuru hodi hetan progresu di’ak liu tan,” nia akresenta. 

Xefe Misaun ne’e informa katak iha futuru, UNICEF iha kompromísiu boot atubele fó apoiu ba Governu introdús teknolojia informasaun iha área edukasaun. 

“Tuir fali mai maka ita haree ba progresu asisténsia públika ba labarik sira, tanba ami investe maka’as iha dezenvolvimentu rekursu umanu no haree asisténsia iha komunidade,” nia subliña. 

Durante sorumutuk, Xefe Ezekutivu agradese organizasaun mundiál ne’e ninia apoiu ba dezenvolvimentu, espesialmente durante Estadu Emerjénsia iha ámbitu krize COVID-19.

“Primeiru-Ministru husu UNICEF atu fó nafatin asisténsia ba Timor-Leste liuhosi edukasaun privadu sira, ne’ebé importante ba planu orsamentu no sei foku ba progresu importante liu maka kombate mál nutrisaun,” nia haktuir.

Jornalista: Cipriano Colo

Editora: Júlia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here