Reprezentante UNICEF iha Timor Leste, Valérie Taton halo vizita kortezia ba Ministru Asuntu Parlamentár no Komunikasaun Sosiál, Francisco Jerónimo, iha Palásiu Governu, sesta (06/11). Imajen Tatoli/Egas Cristovão

DILI, 06 novembru 2020 (TATOLI)—Reprezentante Fundu Nasaun Unida ba Labarik (UNICEF, sigla inglés) iha Timor-Leste, Valérie Taton, halo vizita kortezia no halo despedida Ministru Asuntu Parlamentár no Komunikasaun Sosiál, Francisco Jerónimo, hafoin ramata mandatu durante tinan-tolu fulan-rua.

“Ha’u asume kargu ne’e iha Timor-Leste nu’udar nasaun dahituk, antes ha’u asume ona kargu hanesan iha nasaun barak. Timor-Leste  nu’udar nasaun di’ak tebes ein termu kooperasaun no ha’u hetan esperiénsia barak, ha’u atu  kontinua nafatin serbisu iha ne’e maibé mandatu hotu tenke fila,” Valérie Taton tenik ba Agência TATOLI, iha Palásiu Governu, sesta ne’e.

Reprezentante UNICEF iha Timor Leste, Valérie Taton halo vizita kortezia ba Ministru Asuntu Parlamentár no Komunikasaun Sosiál, Francisco Jerónimo, iha Palásiu Governu, sesta (06/11). Imajen Tatoli/Egas Cristovão

Nia iha esperansa bele iha kooperasaun di’ak liután hodi tau matan ba labarik sira-nia futuru iha Timor-Leste.

Durante ninia mandatu liuhosi kooperasaun haree liu ba aréa edukasaun, saúde no mal nutisaun.

“Iha buat balun ne’ebé seidauk atinje maibé espera bele kontinua iha futuru hodi hetan progresu di’ak liután,” nia akresenta.

Iha fatin hanesan, Ministru Francisco Jerónimo apresia serbisu UNICEF ne’ebé sempre promove interese labarik.

“Ohin hanesan enkontru dala ikus ho Señora Reprezentante tanba nia sei asume knaar hanesan iha rejiaun Áfrika. Ohin nia ko’alia kona-ba saida maka durante ne’e nia halo,” Ministru informa.

Nia nota katak kooperasaun organizasaun mundiál ne’e di’ak tebes desde Governu dahuluk to’o agora.

“Sira apoiu ona rádiu komunidade no parte seluk tan, espera xefe misaun ne’ebé sei mai bele kontinua atividade no programa ne’ebé durante ne’e la’o ona,” nia subliña.

Jornalista: Natalino Costa

Editora: Julia Chatarina   

HAKEREK NO HATÁN

Please enter your comment!
Please enter your name here