Membru governu rua ho komitiva, akompaña ho responsável empreza Heineken haree kondisaun serbisu iha fábrika Heineken iha Hera, segunda (09/11). Imajen/Mídia SEA

DILI 09 novembru 2020 (TATOLI)--Sekretáriu Estadu Ambiente (SEA), Demétrio do Amaral do Carvalho, no Vise-Ministru Turízmu, Komérsiu no Indústria, Domingos Lopes Antunes, hamutuk ho ekipa halo inspesaun ba fábrika multi bebida empreza Heineken Timor S.A iha Hera hodi haree lala’ok serbisu no iha biban ne’e, Sekretáriu Estadu apresia empreza tanba bele kontribui ba polítika zero plástiku.

“Ami-nia vizita hanesan inpesaun ida ne’ebé presiza halo, hodi hatene progresu no atividade foun iha Heineken nia-laran, tratamentu ba lixu reziduu no emisaun sira. Sira satizfeitu tebes ba tratamentu reziduál no lixu sira, inklui emisaun karbonu ne’ebé sira hasai,” governante ne’e informa iha Hera, segunda ne’e.

Heineken nu’udar empreza estranjeiru dahuluk ne’ebé hala’o atividade indústria iha Timor-Leste.

“Ita hatene atividade empreza ne’e importante ba dezenvolvimentu ekonomia no sira hetan ona lisensa ambientál hosi Sekretaria Estadu Ambiente iha janeiru 2020, maibé lisensa presiza renova no lisensa ita fó ba tinan rua,” nia akresenta.

Notísia Relevante: Ministru Joaquim louva Heineken bele mantein produsaun iha situasaun difísil

Membru ezekutivu ne’e nota katak durante ne’e Heineken konsege halo ona mudansa no progresu, hanesan prodúz serveja ho marka Timór

“Serveja Liurai bainhira sira halo lisensa seidauk tama hanesan produtu ida no serveja ne’e prodúz ho matéria prima ai-farina hosi kamponéz lokál sira. Tanba ne’e, presiza halo renovasaun lisensa no hasa’e nível lisensa,” nia fó hanoin.

Heineken organiza rasik to’os-na’in sira hodi kuda ai-farina no serveja Liurai tama ona prosedimentu no sei aplika lisensa.

“Ita hakarak komponéz loke rai kuda ai-farina ho dalan di’ak, labele sunu rai arbiru no estraga área protejidu sira tanba sei fó impaku boot  ba ambiente,  sira kuda iha rai besik ektare 1.000 iha Lospalos,  entaun ita presiza tau-matan ba asuntu ne’e no la’ós de’it ba fábrika maibé iha prosesu hosi kamponéz sira,” Demétrio hatutan.

Reprezentante Heineken, Egas Martinho, hateten vizita membru Governu ho kometiva atu haree lisensa amibientál.

“Ami halo karta pedidu ba sira atu mai halo inspesaun  hodi haree kondisaun reál iha ami-nia fatin serbisu,” nia haktuir.

Nia dehan, durante ne’e empreza ne’e fó ona oportunidade serbisu ba timor-oan no formasaun ba agrikultór sira atu prodúz ai-farina iha Lospalos ba produsaun serveja.

“Husu ba Governu atu hasa’e taxa ka maneira seluk  atubele fó vantajen ba ami,” nia fó hanoin.

Heineken asina akordu investimentu ho Governu Timor-Leste iha janeiru 2015 no akordu ba rai no fábrika Hera asina iha juñu 2015, maibé produsaun hahú iha janeiru 2017.

Komapañia ne’e hanesan investidór estranjeiru dahuluk ne’ebé maka investe iha setór indústria ne’ebé oras ne’e daudaun kria empregu direta no indireta ba timor-oan hamutuk 600 resin.

Plantasaun multi bebida Heineken gasta ona millaun $38 hodi harii ho klase mundiál no sei prodúz serveja oin-oin ho marka internasionál hanesan,  Bintang, Tiger, ABC,  inklui bebida naun alkól seluk tan.

Heineken hanesan serveja marka koñesidu iha mundu ne’ebé fa’an ona iha nasaun 170-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here