Ministru Koordenadór Asuntu Ekonómiku, Joaquim Amarál, hamutuk ho ekipa, akompaña hosi Diretór Ezekutivu Heineken, Prasantha Manjuka, observa serbisu iha plantasaun bebida iha Hera, kinta (30/10). Imajen/Mídia MKAE

DILI, 29 outubru 2020 (TATOLI)—Ministru Koordenadór Asuntu Ekonómiku, Joaquim Amaral, ho ninia komitiva halo vizita ba fábrika multi bebida empreza Heineken Timor S.A iha Hera hodi observa direita serbisu no iha biban ne’e ministru louva tanba kompañia bele mantein halo produsaun.

“Rezultadu ne’ebé ohin ami haree ha’u kontente, maski iha situasaun difísil maibé kompañia mantein ninia funsionamentu no laiha despedimentu, laiha traballadór ida maka lakon ninia serbisu iha situasaun ne’e. Tanba ne’e, ami apresia tanba la’ós fásil kompañia sira halo produsaun iha situasaun ekonomia daudaun ne’e ho kapasidade kompra kiik no atu sobre vive,” Ministru Joaquim informa iha Hera, kinta ne’e.

Governante ne’e rekoñese, situasaun krize COVID-19 halo nasaun tomak inklui Timor-Leste hetan impaktu no halo ekonomia rai-laran sai difísil, tanba ne’e reprezenta Governu, entidade relevante sira observa direita serbisu Heineken.

Ministru dehan, oportunidade vizita ne’e di’ak tebes tanba bele rona preokupasaun empreza ne’ebé halo investimentu boot iha Timor-Leste.

“Ha’u mai  ho ekipa tomak inklui Diretór TradeInvest sira, Servisu Rejistrasaun no Verifikasaun Emprezariál (SERVE) inklui ajénsia ne’ebé iha relasaun ho asuntu ekonómiku husi finansa, Autoridade Tributária, inklui Alfándega, ami hotu mai iha Heineken hodi hatudu Governu ninia interese ba investimentu boot kompañia,” nia informa.

Membru ezekutivu ne’e nota katak Heineken bele mantein iha situasaun ne’ebé kuaze empreza sira deside hapara atividade no traballdór, tanba ne’e presiza tau atensaun.

“Governu iha obrigasaun tomak atu suporta, ha’u orgullu ba ita Timór tanba kuaze produsaun serveja ho marka internasionál maibé Heineke konsege prodúz serveja ho marka Timór hanaran Liurai hamutuk ho serveja seluk hanesan ABC, Bintang no seluk tan,” nia subliña.

Iha fatin hanesan, Diretór Ezekutivu Heineken, Prasantha Manjuka, hateten situasaun COVID-19 afeta tebes ba redimentu empreza, tanba ne’e espera tinan oin bele rekupera hikas negósiu.

“Diferete boot tanba iha tinan 2019 ami-nia negósiu sei di’ak maibé hafoin COVID-19 rendimentu tun, espera tinan oin ami bele rekupera filafali hanesan tinan kotuk. Merkadu ne’e tun 25% kompara tinan kotuk,” Diretór empreza informa, kinta ne’e, iha Hera.

Tanba ne’e, iha biban vizita Ministru ho ekipa, parte Heineken aproveita hato’o preokupasaun.

“Ami kontente ho vizita ne’e tanba bele mai direta hodi haree saida maka ami halo durante krize COVID-19,” nia akresenta.

Responsável kompañia ne’e nota katak durante fulan hirak nia laran kuaze kompañia privadu hasoru problema rendimentu to’o hapara traballór balun, maibé Governu aprova ona orsamentu atu hatan ba situasaun ne’e.

“Ami daudaun tenta atu rekupera, maski ninia situasaun labele hanesan tinan kotuk maibé ami nafatin fa’an ami ninia produtu ne’ebé menus liu tinan kotuk,” nia akresenta.

Heineken asina akordu investimentu ho Governu Timor-Leste iha janeiru 2015 no akordu ba rai no plantasaun Hera asina iha juñu 2015, maibé produsaun hahú iha janeiru 2017.

Komapañia ne’e hanesan investidór estranjeiru dahuluk ne’ebé maka investe iha setór fabrikasaun ne’ebé oras ne’e daudaun kria empregu direta no indireta ba timor-oan hamutuk 600 resin.

Plantasaun multi bebida Heineken gasta ona millaun $38 hodi harii ho klase mundiál no sei prodúz serveja oin-oin ho marka internasionál hanesan,  Bintang, Tiger, ABC,  inklui bebida naun alkól seluk tan.

Heineken hanesan serveja marka koñesidu iha mundu ne’ebé fa’an ona iha nasaun 170-resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here