DILI, 09 novembru 2020 (TATOLI)—Médiku espesialista hamutuk ema na’in 32 husi Ospitál Nasionál Guido Valadares (HNGV-sigla portugés), iha segunda ne’e, fó ona tratamentu saúde masal ba sobrevivente masakre 12 novembru Santa Cruz Dili 1991.
Tratamentu saúde masal ne’e hala’o iha edifísiu Sekretáriu Estadu Juventude no Desportu (SEJD) Lecidere Dili komesa ona iha tuku 09:00 dader no sei ramata iha tuku 16:30 Otl.
Notísia Relevante:HNGV koloka medíku 30-resin halo tratamentu saúde masal ba sobrevivente
Komisaun organizadora komemorasaun masakre Santa Cruz ba dala 29 no selebrasaun Loron Nasionál Juventude ba dala 15 realiza programa refere hodi responde pedidu husi sobrevivente sira atu hetan tratamentu espesiál iha ámbitu komemorasaun loron istóriku ba tinan ida ne’e.
“Tuir lista hahú husi tuku 09:00 dader to’o tuku 11:00 Otl; sobrevivente 50-resin maka rejista ona hodi halo tratamentu saúde,” Prezidente Komisaun Organizadora, atuál Prezidente Alumni Parlamentu Foinsa’e Timor-Leste (APFTL), Zaulino Gomes da Silva, informa ba Tatoli, via telefone, segunda ne’e.
Nia hateten profisionál Saúde sira ne’ebé maka ohin fó konsulta ba sobrevivente sira ne’e mai ho espesialidade iha área oioin hanesan medicina interna, pediátria, sirúrjia, farmolojia no seluk tan.
Notísia Relevante:Médiku HNGV sei fó tratamentu saúde masal ba sobrevivente 12 novembru
Jornalista : Tomé Amado
Editór :Agapito dos Santos
